Karla Lekuona zelaia omenduko dute hilaren 25an
Oiartzun Kirol Elkartearen gotorlekua eraberrituko dute udaratik aurrera, eta egun osoko egitaraua antolatu dute hilaren 25erako, musika, pintxo... eta futbolarekin.
Zelaia itxuraldatzen hasiko dira aurten. Oiartzun Kirol Elkarteak egun loriatsu asko bizitu ditu Karla Lekuona futbol zelaian. Azken agurra emango diote zelai historikoari… baina eraberritu egingo dutelako. Udara partean hasiko dituzte lanak, data zehatzik gabe. Zaharberritzeaz gain, belar natural izatetik artifiziala izatera pasatuko dela aurreikusi du proiektuak.
Omenaldia egingo diote hain kuttuna duten Ugaldetxoko zelaiari. Egun osoko egitaraua antolatu du OKEk, hilaren 25erako.
10:00etan, jokalari beteranoen arteko partida izango da, emakume eta gizon. Hori bukatuta, eguerdian, gizonen taldeak denboraldiko azkeneko partida jokatuko du, Bergararen kontra.
Partidaren atsedenaldia dultzaineroek girotuko dute, eta pintxoak zerbitzatuko dituzte. Bigarren zatiaren bueltan, pintxo gehiago jateko aukera izango da, eta NE rap taldearena izango da girotzeko ardura.
Sarrerak hilaren 20ra arte izango dira salgai, Urrats paperdenda, Miren, Kabitxo eta Intxixu tabernan, eta futbol zelaian bertan. 5 euroko prezioa izango dute. Edarien tiketak egunean bertan salduko dituzte.
