Nakbak ez duela etenik salatu dute
Orereta Palestinarekin Herri dinamikak Palestinaren alde antolatutako mobilizazioetan parte hartzera deitu ditu herritarrak.
Nakbak etenik ez deula salatzen duen kartel bat. Argazkia: Orereta Palestinarekin Herri dinamika 1948. urtean 700.000 palestinar baino gehiago beren etxeetatik kanporatu zituzten eta etxerik eta lurrik gabe utzi zituzten. Nakba edo hondamendia, hala gogoratzen dute palestinarrek hura, eta 76 urte luze joan badira ere, Nakba horrek etenik ez du izan. Mugimendu sionistak, Europa eta AEBen laguntza eta konplizitateari esker, Palestinan Israel estatua ezarri zuen sarraskien bidez, bertako biztanleriaren % 70 baino gehiago kanporatuz, eta Palestina suntsituz.
Urtero maiatzaren 15ean tragedia salatu eta palestinar errefuxiatuek beren lurretara, beren etxeetara, beren herrira itzultzeko duten eskubidea aldarrikatzen dute. Nakba gogoan hartuta, hondamendiak ez duela etenik salatu du Orereta Palestinarekin Herri dinamikak eta salaketa kalera eraman du kartelen bidez. Gaurko egunaren harira, bideoa ere zabaldu du dinamika herritarrak, gertaera tragiko hartatik 76 urte pasa direnean, Gaza Israelgo Estatuak inoiz egindako erasorik bortitzena jasaten ari dela gogoratzeko azken zazpi hilabetean. Hemen klik eginda ikus daiteke bideo hori.
Palestinaren aurkako genozidioa eteteko eskatu dinamikak, beste behin ere, eta dei egin die herritarrei Palestinaren alde antolatutako mobilizazio eta ekitaldietan parte har dezaten. Horren harira, gogora ekarri du dinamikak, gaur bertan, Nakba egunarekin bat eginda, BDZ Boikota, Desinbertsioa eta Zigorrak antolakundeak deituta manifestazioa izango dela Donostian 19:00etan, Bulebarretik abiatuta.
Ostiralean berriz, sindikatuek deituta, geldialdi eta elkarretaratzeak egingo dituzte lantegi kanpoaldetan. Horiek babesteko deia ere egin die langileei dinamikak. Azkenik, larunbatean 12:30ean Iruñean deitu duten nazio manifestaziora joateko deia ere zabaldu du.
