DYA izango da madalenetako omendua
Ausaz eratutako hemeretzi herritarren batzordeak hala erabaki du. Hiru argudio nagusi erabili dituzte erabakia hartzeko: elkartearen izaera boluntarioa, zabala eta herrian duen errotzea.
Omenduaren hautaketan parte hartu duten herritarrak. DYA elkarteak piztuko du aurtengo madalenetako txupina. Ausaz eratutako hemeretzi herritarren batzordeak hala erabaki du. Hiru argudio nagusi erabili dituzte erabakia hartzeko: elkartearen izaera boluntarioa, zabala eta herrian duen errotzea. Elkarte horrek egiten duen lan boluntarioa izan da erabakia hartu dutenen artean gailendu den argudioetako bat, ahaztu gabe gizarte osoari “bereizkeriarik gabe” ematen dion arreta.
Elkarte hori, gainera, duela mendi erdi hasi zela lanean Gipuzkoan, baita Errenteria-Oreretan ere.
Hiru hautagaitza izan ditu hautaketaren ardura izan duen herritar taldeak mahai gainean: DYArekin batera, Txema Arenzanak eta Oliver Nestarrek osatu dute hirukoa.
Aukeraketa sistema berria da, eta iaz onartu zen herriko jaietan omenaldi sariak emateari buruzko ordenantza arautzailearen ondorio da. Aurten sartu da indarrean araudi hori, eta bere ekarpenen artean daude omendu proposamenak egiteko aukera herritar orori zabaltzea. Azken erabakia, berriz, ausaz aukeratutako herritar batzorde baten esku utzi da. Madalen jaiak herrikoiagoak izatearekin batera, herritarrak udal kudeaketan parte hartzea ere bilatzen du iniziatiba berriak.
Erabakitze prozesua
Martxoaren 1etik 30era Errenteria-Oreretan erroldatutako herritarrek, eragile zein elkarteek eta udalean ordezkaritza duten alderdi politikoek hautagaiak aurkeztu zituzten. Proposamenak jasota, zerrenda egin zuten zerbitzu juridikoek. Bost hautagai proposatu zituzten, eta horietako bat kanpoan utzi aurretik ere omendua izan zelako. Udaleko bozeramaileen batzordeak hirura jaitsi zuen zerrenda hori.
Udal errolda erabilita, berriz, zozketa egin zen 800 pertsona aukeratzeko, 16 urtetik gorakoak. Gonbidapena onartu zutenen artean zozketa egin, eta 19 lagun hautatu zituzten batzordea aukeratzeko. Hilaren 8an eta 15ean bilerak egin ditu batzorde horrek. lehen saioan hautagaien berri jaso zuten. Bigarrenean berriz, aukeraketa egin zuen batzordeak, argudioak adostuta.
Hilaren 28ko plenora eramango dute, jakinarazteko.
