Urtean zehar egindakoa gizarteratuko dute erretiratuen elkarteek
Ateak Zabalduz iniziatiba egingo dute Errenteria-Oreretako jubilatuen klubek hilaren 20tik 24a, udalarekin elkarlanean. Gaur egin dute jardunaldiaren hamargarren ekitaldiaren aurkezpena Gabierrotako Laguntasuna Jubilatuen elkartearen egoitzan.
Erretiratuen elkarteetako ordezkariak gaurko agerraldian, Aizpea Oategi alkatearekin eta Eñaut Gracia Gizarte Zerbitzuetako zinegotziarekin. Ateak Zabalduz iniziatiba egingo dute Errenteria-Oreretako jubilatuen klubek hilaren 20tik 24a, udalarekin elkarlanean. Gaur egin dute jardunaldiaren hamargarren ekitaldiaren aurkezpena Gabierrotako Laguntasuna Jubilatuen elkartearen egoitzan, Aizpea Otaegi alkateak, Eñaut Gracia Gizarte Zerbitzuetako zinegotziak, eta herriko jubilatuen zortzi elkarteetako ordezkariek —San Agustin, Beti Bizkor, Bienvenido, El Parque, Laguntasuna, Arramendipe, La Magdalena, eta San Jose—.
Ateak Zabalduz programa erakusketatik harago doa, eta astebetez egitarau zabala ontzen dute urtero 2013an martxan jarri zuenetik udalak. Zehazki, urtean zehar elkarteetan egiten duten lana herritarrei zabaltzea eta erakustea dute helburu jardueraren bidez. Aurten ere askotariko egitaraua ondu dute elkarteek eta udalak elkarlanean. Ekintzak Merkatuzarreko Jose Luis Caso aretoan egingo dituzte, goizetan klubetan programatutako jarduerak izan ezik. Errenteria-Oreretako edozein klubetako bazkide orok har dezake parte, Lagunkide-Acogeren ekintzetan izan ezik; horietan zerbitzu horren erabiltzaileek baino ezingo dute parte hartu.
Jarduerei hasiera emateko bi hitzaldi antolatu dituzte. Lehenengoa astelehen, hilaren 20an, arratsaldean izango da 17:00etatik 18:30era eta segurtasuna izango dute hizpide. Herritarren segurtasuna: Iruzurrak eta lapurretak goiburua du udaltzaingoarekin elkarlanean prestatutako hitzaldiak. Bigarren hitzaldia, astearte arratsaldean: Industria Errenterian, Mantxester Txikia. Herriko turismo bulegoarekin elkarlanean sortutako hitzaldia da, eta bi zati izango ditu; batetik, industria garaiko kokapen historikoa egingo dute, eta ondoren, lantegi horietan aritutako pertsonek beraien lan esperientzia eta bizipenez hitz egiteko aukera izango dute. 17:00etatik 18:00etara izango da hitzaldia.
Elkarte guztietan egiten den ekintza bati ere emango dute bide, elkarteetako ordezkariek azaldu dutenez, arrakasta bizikoa delako: Bingoa. Ostegun arratsaldean —hilaren 23an— egingo dute 17:00etatik 18:30era, eta opariez gain, hainbat sorpresa izangod ela ere jakinarazi dute gaurko aurkezpenean.
Tailerren aurkezpena
Jubilatuen elkarteetan urtean zehar egiten direnjarduera asko eta asko, adinekoen gaitasun fisikoa eta mentala lantzera bideratuta daudela nabarmendu dute gaurko agerraldian, eta elkarte gehienetan errepikatzen direla jarduera horiek. Hala ere, badira hiru elkarte beraiek bakarrik eskaintzen duten jarduera ezberdinen bat dutena. Hori da Gabierrotako Laguntasuna elkartearen kasua, Yoga-Risoterapia eskaintzen du. Galtzarabordako El Parque elkarteak berriz, irakurketa taldea dute martxan; eta Olibeteko Beti Bizkor elakrtean Artearen Historiaren gaineko tailerra antolatzen dute. Jarduera berezi horiei leku eman diete aurtengo jardunaldian, eta hiru klubetan saio berezi bana antolatu dute, beste elkarteetako bazkideek parte hartu eta ezaguzteko aukera izan dezaten.
Yoga-Risoterapia saioa astelehenean, hilak 20, izango da Laguntasunaren egoitzan 11:00etatik 12:30era; Artearen Historiaren gainekoa, berriz, hilaren 21ean, asteartea, 11:00etatik 12:00etara Olibeteko Beti Bizkor elkartean; Irakurketa taldearen tailerra, berriz, hilaren 23an, ostegunarekin, izango da 11:00etatik 12:30era El Parque elkartean.
Lagunkide-Acogeko bost taldeek ere hartuko dute parte jardunaldian. Gizarte zerbitzuetako programa bat da Lagunkide-Acoge, eta harrera, prebentzio eta bizikidetza zerbitzu bat eskaintzen du, hainbat jardueren bidez. aurtengo jardunaldien barruan, bost taldeak elkartuko dira hilaren 22an, asteazkena, 10:00etatik 13:00etara Merkatuzarren, hainbat jarduera ludiko eta hamaiketakoa egiteko. aurtengo jarduera, karaokea izango dela jakinarazi dute.
Egun horretan bertan, baina arratsaldez, 17:00etatik 18:00etara zehazki, erretiratuen zenbait klubetako abesbatza taldeek emanaldia eskainiko dute. Banaka ariko dira lehenik, eta ondoren batera egingo dute errepertorioa. Publikoa ere animatuko dute abestera eurekin batera.
Ginga bazkariak jarriko dio jardunaldiari. Ostiralean izango da, hilaren 24an, 14:00etan hasita eta musikaz girotuta izango dela jakinarazi dute. Parte hartzeko aurrez izena eman behar dute elkarteetako bazkideek.
3.300 bazkide zortzi elkarteetan
Aizpea Otaegi alkateak eta Eñaut Gracia Gizarte Zerbitzuetako zinegotziak adi jarraitu dute jubilatuen elkarteetako ordezkariek egindako aurkezpena. Otaegik hitza hartu du ondoren, eta eskerrak eman dizkie guztiei udalaren izenean, “hau guztia antolatzeak sekulako lana ematen duelako. Horretaz gain, egunerokoan egiten duzuen lana zuen auzoetan handia da, oso eragile garrantzitsua zarete zuen auzo eta herrian, oro har”. Elkarteen erreferentzialtasuna eta herriari egiten dioten ekarpenari aitortza Otaegik, “zenbatu ezina da ekarpen hori, eta aitortu behar da eta ospatu”.
Egitarauari erreparatu dio gero alkateak, eta antolatutako guztietan parte hartuko lukeela esan du, “oso interesgarriak dira antolatutako ekintza guztiak. Hutsik egin gabe, bazkarian izango naiz”.
Gaur gaurkoz, zortzi jubilatuen elkarteetan 3.300 lagun inguru ari dira urtean zehar jarduerak egiten.
