Gaztañoko jaietako lehen eguneko egitaraua zabaldu dute
Ekainaren 14tik 16ra egingo dituzte Gaztañoko jaiak eta ekainaren 23an, Su Gaua. Aleka hasi dira zabaltzen egitaraua, eta momentuz ostiralekoaren berri eman du jai batzordeak.
Hilabete exkax falta da Gaztañoko jaietarako, baina denbora luze daramate lanean jai batzordeko kideek horien prestaketan. Ekainaren 14tik 16ra egingo dituztela, eta GaztañoRock kontzertuan arituko diren taldeen kartelaren berri zabaldua zuen jai batzordeak. Orain, jaietako lehen eguneko egitarau osoa zabaldu du.
Protagonista, beti bezala, Maritxu sorgina txupinazoak eta haren jaitsierak emango diete aurten ere hasiera jaiei. Gaztañoko jaietako beste klasikoa, eta jai guztietarako indar berezia ematen diena auzotarrei zein kanpotik gerturatzen direnei: Edabe magikoa. 20:00etan zabalduko dute Iratxo iturria, eta bertatik aterako edabea probatu nahi duen orok egin dezan.
Eguneko hitzordu garrantzitsuena, GaztañoRock jaialdia izango da plaza nagusiko karpan 22:30ean hasita.
Kamiseta salgai
Errepublika independente eta intsumituak —hala deitzen dute bertakoek— jaietarako ondu duen kamiseta salgai jarriko duela ere kjakinarazi du. Datorren astean izango da hori, 23an eta 24an; baita hilaren 27tik 30era ere. Auzo lokalera joan beharko dute kamiseta erosi nahi dutenek, 19:00etatik 21:00etara. Prezioa, 10 euro.
Larunbateko egitarau oraindik ere isilekoa bada ere, tradizio den herri afaria egin egingo dutela zabaldu da, txartelak salgai direlako. Horien inguruan ere hainbat ohar zabaldu ditu jai batzordeak, gehienez ere bost txartel eskura daitezke pertsonako; salneurria, 12 eurokoa da, eta erabilera anitzeko gunean egingo dute.
- 18:00: Pontx pailazoaren Gelara ikuskizunarekin jaien hasiera.
- 19:00: Txupinazoa eta Maritxuren jaitsiera auzoko trikitrixa eta pandero taldearekin.
- Ondoren, buruhandiak auzoan zehar, auzoko jaioberriei kamiseta banatzen zaien bitartean.
- 20:00: Iratxo Iturritik edabe magikoa probatzeko aukera.
- 20:30: Patata tortila lehiaketa sukaldari trebeenentzat.
- 22:30: VII. gaztañorock kontzertua plaza nagusiko karpan: The Clayton, Streetweise, Arena 6, Yakovlev 42.
- Jarraian Gaztetxean: DJ Lafulana
- eta Bukagaitzen, DJ Gusturika.
