Oiartzun larunbatean lehiatuko da areto futboleko txapelagatik
Areto futboleko taldeek kanporaketak jokatu dituzte Elorsoron. Lehen taldeak aurrera egin du, eta Miren Tabernak gol bakarragatik galdu du.
Oiartzuarrak, ostiralean. Futbolaren familiako senide txikiaren arratsalde polita programatua zuten Elorsoron, ostiral arratsalderako. Gipuzkoako Lehen Mailako eta Bigarren Mailako txapelketetako finalerdi bana jokatu zituzten Oiartzungo kiroldegian.
Oiartzun eta Miren Taberna taldeek —bakoitza bere mailan— lanak txukun egin dituzte liga erregularrean, eta finalerdiak jokatzeko txartela lortu zuten. Biek kantxa faktorea egikaritzeko aukera izan zuten, gainera.
Bigarren Mailakoak hasi ziren. Makax Gorka Margoak taldearen kontra neurtu zituzten indarrak. Partida gaizki hasi zen etxeko taldearentzat, eta lehenengo minutuan Donostiako taldea aurreratu zen. Atsedenaldia baino lehen lortu zuten berdinketa.
Bigarren zatian, oiartzuarrek aurrea hartu zuten, baina donostiarrek markagailua irauli zuten bi gol lortuta. 2-3ko markagailuak finalerako txartela eman zien.
Oiartzun, Oñatira
Lehenengo partidaren zaporea mikatza izan bazen, bigarrenak gustu hobea izan zuen. Lehen taldeak Idiazabal Baireformasen kontra jokatu zuen, aurreko asteburuan bezala, eta oiartzuarrak nagusi izan ziren.
Izerdia bota behar izan zuten, hori bai. Oiartzunek heldu zion jokoaren lemari, eta 2-0 aurreratzea lortu zuten. Goierritarrek aldea moztu zuten, baina oiartzuarrek ura bere bidera eraman zuten, hirugarrena lortuz. Atsedenaldira iritsi baino lehen, idiazabaldarrek bigarrena lortu zuten.
Bigarren zatia antzeko joan zen: ekintza-erreakzioa-ekintza. Oiartzuarren gola, idiazabaldarren erantzuna eta berriro oiartzuarren gola. 5-4 elektronikoan. Oiartzuarrek seigarrena lortu zuten, partida itxi eta finalerako txartela eskuratzeko. Modu horretan, larunbatean nor baino nor arituko dira Lauburu taldearen kontra, Oñatin. Ibarrakoak bigarren izan dira sailkapenean.
Futbolean, kaskar
Denboraldiak bukatzen ari dira, eta gizonen talde nagusiari partida bakarra geratzen zaio. Azken aurreko asteburua, baina, ez da onena izan. Aretxabaletara joan ziren, eta hasieratik etxekoak askoz hobeak izan ziren, zentzu guztietan.
Oiartzuarrek bost jaso zituzten UDAren kontra, ez zuten argudiorik erakutsi. Larunbatean jokatuko dute ligako azkeneko partida, Bergararen kontra. Karla Lekuona zelaiak belar naturala izango duen azkeneko partida izango da hilaren 25eko hori. Horregatik, festa antolatu du Oiartzun Kirol Elkarteak.
Gizonezkoen Ohorezko Erregional Maila
- Aretxabaleta — Oiartzun: 5-0.
Emakumeen Euskal Liga
- Oiartzun — Aranbizkarra: 5-0.
Gizonen Lehen Erregionala. Kopa M-1.
- Oiartzun B — Landetxa: 3-1.
Emakumeen Ohorezko Erregional Maila
- Urola — Oiartzun C: 7-1.
Mutilen Gazte Mailako Euskal Liga
- Oiartzun — Añorga: 2-1.
Mutilen Gazte Mailako Gorengo Maila
- Oiartzun B — Touring B: 2-5.
Mutilen Gazte Maila. Gipuzkoako Kopa: M1.
- Oiartzun C — Usurbil B: 6-0.
ARETO FUTBOLA
Gizonen Gipuzkoako Lehen Maila
- Oiartzun — Idiazabal: 6-4.
Gizonen Gipuzkoako Bigarren Maila
- Miren Taberna OKE — Makax Gorka Margoak: 2-3.
