Elorsoroko igerileku handia, hiru egunez itxita
Astearte goizean izandako matxura konpondu behar dute, eta ostiral goizean irekiko dute, dena ondo bidean.
Ziurrenik ostiralean irekiko dute igerilekua. Elorsoro kiroldegiko igerileku handia itxita dago. Hala jakinarazi du Oiartzungo Udalak. Gaur goizean matxura izan du igerilekuko ura berotzen duen bonba nagusia. Ondorioz, uraren tenperatura kontrolatzeko eta kloroa moldatzeko zailtasunak izan dituzte.
Bonba txiki baten bidez, irekita mantendu dute goizean, baina arratsaldean zehar hozten joango dela eta, ixtea erabaki dute. 16:15etik aurrera, beraz, ezin izango da igerileku handia erabili.
Konponketa lanak hiru egunez luzatuko direla aurreikusi dute kirol instalazioko arduradunek. Astearte, asteazken eta ostegunean igerileku handia itxi egingo dute eta bertan programatuta zeuden igeriketa ikastaroak ere bertan behera utzi dituzte.
Bonba konpondu eta tenperatura eta kloroa ohiko mailara iristean irekiko dute igerilekua. Ziurrenik, ostiralean izango da.
Ikastaroak, ekainean
Bertan behera geratu diren ikastaroak ekainaren 10eko astean errekuperatuko direla jakinarazi dute. Horrez gain, kiroldegiko arduradunek gogorarazi dutenez, KirolTxartela Mugimenti esker, erabiltzaileak beste igerileku batzuetara joan daitezke, hala nola Errenteria-Orereta, Lezo edo Irunera.
Beste kiroldegiak erabili ahal izateko, beharrezkoa da aurretik mugikorrean KirolTxartela Mugiment aplikazioa deskargatu eta erabiltzailearen datuak sartzea.
