Langile gehiago eskatu dituzte zaintza duina bermatzeko
Ez dute hobera egin Sanmarkosene eta Jesusen Bihotza adinekoen erresidentzietako baldintzek, ez langileentzat ezta egoiliarrentzat ere, eta horrenbestez protestak egiten jarraitzen dute.
Sanmarkosenen elkarretaratzea joan den maiatzean adinekoen erresidentzietako auzia konpontzeko eskatzeko. Argazkia: Duintasuna Gaur ere kalera atera dira. Ez dute hobera egin Sanmarkosene eta Jesusen Bihotza adinekoen erresidentzietako baldintzek, ez langileentzat ezta egoiliarrentzat ere, eta horrenbestez protestak egiten jarraitzen dute.
Gaur, Sanmarkosene egoitzaren aurrean egin dute elkarretaratzea langileek, erabiltzaileen senideek, baita erabiltzaileetako batzuek ere. Langile gehiago eta ezarritako ratioak berrikustea eskatzen ari dira zaintza publiko duina bermatu ahal izateko.
Bihar, Jesusen Bihotza egoitzako langile eta erbiltzaileen senideek hartuko dute protestaren lekukoa. 10:45ean elkarretaratzea egingo dute egoitzaren aurrean. Arratsaldean berriz, gaiaren gaineko lanketa egiteko sortutako herrigintza sareak hartuko du txanda. Oreretako Mugimendu Feministak, Bilgune Feministak, auzo elkarteek, erresidentzietako langile eta erabiltzaileen senideek eta Duintasuna elkarteak osatzen dute sare hori, eta batzar irekia egingo dute 18:30ean hasita, Reina aretoan.
Mobilizazioak hasita, bilera egin zuten eragile horiek Gipuzkoako Foru Aldundiarekin gaiaren gainean hitz egiteko, eta bilera horrek emandakoaren berri zabalduko dute biharko batzar ireki horretan; bigarren bilera bat egiteko zain dira, eta aldundiak bi erresidentziak bisitatu baditu ere, momentuz, bederen, aldaketarik ez dela izan berretsi dute herri eragileek.
Bihar goizeko elkarretaratzearekin zein batzar irekiarekin bat egitera deitu dituzte herritar guztiak, “zaintzarena guztioi eragiten digun gaia delako”.
