Sagardo Egunarekin hasi da udaberria
Goizean herriko zukuak dastatzeko aukera izan da, eta sagardoaren prozesuaren erakustaldia egin dute. Arratsaldean, plaza jendez lepo bete da.
Udaberri makurra izaten ari zen. Atzora arte. Eguraldia dagokion datari doitu, eta galazko soinekoa jantzi du, Oiartzungo Sagardo Egunarentzako prest egoteko.
Eguraldi bikainari dagokion kutxatxoan X bat jarrita, gainontzekoa ongi ateratzea bakarrik falta zen. Baina, antolakuntza lan finaren ondorioz, X guztiak bete dituzte, bata bestearen atzetik.
Goizean goizetik, artisauen azokak bete du plaza. 11:30 inguruan, sagardoa egiteko prozesua erakutsi dute, matxaka, dolare eta abarrekin. Ondoren, herriko bederatzi sagardo dastatzeko aukera izan da, bazkalordura arte.
Teo Mujikari aitortza
Ohi bezala, arratsaldean bildu da jende gehien. Txotxa egin aurretik, urteroko omenaldia egin dute, eta aurtengoa ere sorpresa izan da: Teo Mujikak aparte utzi behar izan ditu lotsak oholtzara igotzeko.
Herrigintzan egindako lana eta betiereko prestutasuna aitortu diote Mujikari. Bertsoak kantatu dizkiote, eta Olarriko bi dantzarik Agurra eskaini diote.
Ondoren, berak izan du “Txotx!” deiadar egiteko ohorea. Hamar minutu lehenago ia hutsa zegoela zirudien plaza jendez betetzen hasi da. Ezinbesteko osagarriak zituzten: sagardoa edateko edalontzia, pintxoarentzako papertxoa, eta eguzkitako betaurrekoak.
Herriko bederatzi sagardo eta sagardotegietako beste hainbeste edateko aukera izan da, boluntarioek prestuki zerbitzatuta.
Parrandak kontzejupean jarraituko du. Bada zer ospatu: oso berandu bada ere, udaberria hasi da.
