Oreretak Ikastola Eguna ospatuko du larunbatean
Egun handia Añabitarten izango da, eta egun osoko programazioa antolatu dute festaz gozatzeko. Autobusak jarriko dituzte hirigunetik Añabitartera igotzeko.
Orereta Ikastolak Ikastolaren Eguna ospatuko du larunbat honetan (ekainak 1) Añabitarten. Ospakizunak 11:30ean egingo du eztanda ekitaldi nagusiarekin eta Urdaburu Mendizale Elkartearen ikasturte bukaerako domina banaketarekin. Ondoren, adin guztietako haur eta gazteentzat jolasak izango dira. Bazkaria autogestionatua izango da, eta sabelak bete ondoren, arratsaldean, puzgarriez, DBHko DJen musikaz, ur zezenaz eta apar festaz gozatuko dute Añabitartera bertaratzen direnek.
Egun osoan zehar, ikasleen lanen eta Urdaburuko irteeretako argazkien erakusketak izango dira ikusgai. Horrez gain, baserrian pintxoak eta edariak dastatu ahal izango dira, Batxilergoko ikasleek gozoki denda jarriko dute eta Kilometroak-eko arropa eta osagarrien dendan produktuak izango dira eskuragarri.
Urtero bezala, hirigunetik Añabitartera joan-etorriak egiteko autobusak jarriko ditu ikastolak. 10:15etik 11:15era bitartean, Errioxa biribilgunetik irtengo dira Añabitartera. Itzulerako autobusak 14:00etan eta 18:30ean izango dira.
Oreretak adierazi du “elkar antolatu eta elkar jolasteko festa” dela Ikastolaren Eguna; hori dela eta, ikastolakide eta herritar guztiak gonbidatu dituzte haiekin batera festaz gozatzera.
Ikastola Eguna
- 11:30: Ekitaldi nagusia eta Urdaburu Mendizale Elkartearen domina banaketa, futbol zelai berrian.
- 12:00-13:30: HH eta LHko haurrentzako jolas eta tailerrak eta DBHko gaztetxoentzako jolasak, LHko pista gorrian.
- 14:00: Bazkari autogestionatua, LHko pista gorrian.
- 15:00-15:30: Blaitu MHLZ lehiaketaren final handia, LHko areto berrian.
- 15:30-17:30: DBHko DJen musika, baserri inguruan.
- 17:30: Ur zezena, baserri inguruan.
- 17:45: Apar festa, LHko aterpe nagusian.
- Egun osoan zehar:
- Ikasleen lanen eta Urdaburuko irteeren argazkien erakusketa, gimnasioan.
- Edariak eta pintxoak, baserrian.
- Batxilergoko ikasleen gozoki denda.
- Kilometroak 2024ko arropa eta osagarrien denda.
- Musika.
