Energia-klima jardunaldiak, Lezon
Iratzerrik eta udalak antolatuta, hiru ekitaldiko jardunaldiak egingo dituzte herrian. Energia komunitatea sortzeko bidea sendotu nahi dute.
Iratzerri Lezo Ingurumen Elkarteak eta Lezoko Udalak elkarlanean, Energia-Klima Jardunaldiak antolatu dituzte Lezon datozen egunetarako. Zehazki, hiru ekitaldiko egitaraua da osatu dutena, betiere herritarren ekarpena garrantzitsua izango delarik. Jardunaldiak herrian energia komunitatea sortzeko bultzada bezala ulertu behar dira, informazio eta ekarpen foroekin. Gainera, argindarraren faktura ulertzeko ekitaldia ere prestatu dute.
Lehen ekitaldia bihar (hilak 30, osteguna) izango da Gezala Auditoriumean (18:30). Lezoko Udalaren Energia Planaren diagnosia aurkeztuko dute Izadi 21eko kideek. “Energia planak klima larrialdiri erantzuteko herri mailako estrategiak definituko ditu, eta horren erreferentzia izango da diagnosia”, azaldu dute Iratzerriko kideek. Hala, plana osatzeko herritarren ekarpenak jaso nahi dituzte bihar bertan.
Bigarren saioa ekainaren 4an (asteartea) jasoko du Gezalak (18:30). Bertan, Goienerreko kideek energia berriztagarrien komunitatea sortzeko aholkularitza zerbitzuaren berri emango dute.
Azken jarduera ekainaren 6koa (osteguna) izango da, 18:30ean Kultura Aretoan. Iratzerriko kideek argindarraren faktura ulertzeko argibideak emango dituzte, eta energia aurrezteko irizpideak emango dituzte tailer bidez.
Jardunaldietan parte hartzeko asmoa duten herritarrei aurrez izen emate formularioa betetzeko eskatu die Iratzerrik.
