'Elbira Zipitria andereñoa', oiartzuarrek egina
Antton Kazabon idazleak eta Jokin Mitxelena ilustratzaileak euskarazko hezkuntzan berebiziko garrantzia izan zuen Zipitriaren gaineko liburua egin dute.
Kazabon, Mitxelena, Jon Insausti (Donostia Kultura) eta Unai Pascual (denonartean argitaletxea), atzoko liburuaren aurkezpenean. Antton Kazabonek eta Jokin Mitxelenak Elbira Zipitria andereñoa liburua egin eta aurkeztu dute. Ikastolen mugimenduaren sortze eta hazkundean ezinbesteko izan zen zumaiarraren bizitza kontatu dute Kazabonek testuekin eta Mitxelenak ilustrazioekin. Atzo aurkeztu zuten Donostian 36 orrialdeko eta 800 aleko tiradako euskarria. Donostiako Udaleko Kultura Sailaren laguntza izan dute oiartzuarrek egitasmoa egikaritzeko, Denonartean argitaletxearen babespean.
Liburua Donostia Kulturako liburutegien haur sail guztietan izango da, eta hiriko ikastetxeetan ere banatuko dute. Liburu dendetan, berriz, 15 euroan erosi ahal izango da.
Euskaltzalea
Elbira Zipitria (Zumaia 1906-Donostia 1982) euskaltzale sutsua izan zen. Aitaren lanagatik lekualdatu zen Donostiara oso gazte zela. 1936ko gerraren osteko lehen ikastola klandestinoa hark jarri zuen martxan, pedagogia aurrerakoia erabiliz, neska-mutilak berdintasunean eta euskara hutsean heziz. Irakasleen prestakuntzan ere aritu zen, baita helduak euskaldundu eta alfabetatzeko Gau Eskoletan ere. 22 urterekin hasi zen lanean ikastetxe ‘ofizial’ batean, zehazki Donostiako Koruko Andre Mariaren ikastetxean, haren ardurapean 200 bat ikasle izan zelarik, denak euskaraz ikasten.
1936an, gerraren ondorioz, Ipar Euskal Herrira ihesean joan zen. Han euskarazko eskolak ematen jarraitu zuen. 1942an itzuli zen Donostiara, frankismoaren eragina oso nabarmena zelarik orduko hartan. Hala, euskaraz irakastea debekatuta egon arren, horretan jarraitu zuen Zipitriak hainbat etxebizitzatan, baita bere etxebizitzako egongelan ere.
Ikastolak legeztatzean hainbaten sorreran lagundu zuen, beste askoren artean direlarik Oiartzungo Haurtzaro Ikastola, Pasaia-Lezo Lizeoa, edo Donostiako Orixe.
