XXXV. Galiziako Eguna ospatuko dute Trintxerpen
Euskal Herri mailako topaketa Pasaian egingo da hilaren 31tik ekainaren 2ra. Ekitaldi mordoa antolatu dituzte festaz gozatzeko.
Xoan Alonso, Teo Alberro eta Iraitz Pazos, ekitaldien aurkezpenean. Trintxerpek Euskal Herriko XXXV. Galiziako eguna jasoko du hilaren 31tik ekainaren 2ra. Aurtengo ekitaldia indartsu lurreratuko da Pasaian, ekitaldi mordoarekin. Herritarrek kirol jarduerez, kontzertuez, kalejirez, dantzez edota lehiaketez gozatuko dute. Teo Alberro alkateak, Iraitz Pazos Trintxerpeko alkateordeak, eta Xoan Alonso Irmandade de Centros Galegos erakundeko idazkariak nahiz Galiziako Etxearen Gipuzkoako presidenteak aurkeztu dituzte jarduerak.
Alberroren arabera, hiru eguneko ekitaldi aroaren bitartez Galiziako eta Euskal Herriko komunitateen arteko adiskidetasuna sinbolizatu nahi da, eta Galiziak Pasaiarekin zehazki duen itsas tradizio partekatua aitortu nahi da, “Euskal Herriaren eta Galiziaren arteko batasun sakon eta iraunkorra sortu duena”. Itsasoarekin, nabigazioarekin eta arrantzarekin, bizibide batetik harago, “nortasun bat eta mundua ulertzeko modu bat” batu direla baietsi du udal agintariak.
Alkateak nabarmendu du Pasaian galiziarren komunitate handi bat bizitzeak lotura hori estuagoa izatea eragin duela, “galiziar askok beren etxea bihurtu dute gure herria”. Era berean, Galizian ere badira euskaldunak, eta horrek bi herrien arteko lotura are sendoagoa izatea ahalbidetu duela adierazi du Alberrok.
XXXV. Galiziako Egunaren barruko egitaraua oso-osoa da. Asko dago ikusteko eta gozatzeko. Beheko koadroan dago ekitaldien zerrenda osoa.
XXXV. Galiziako eguna
Maiatzak 31
- 20:00: Euskal Herriko XXXV. Galiziako egunaren inaugurazioa. Agintarien harrera.
- 20:30: Xirolarularien animazioa jai barrutian.
- 22:30: Bad Sound System feat Sorkun – Jaranaren Eguneko musika kontzertua, Serafin Esnaola plazan.
Ekainak 1
- 12:00: Euskal herri kirol erakustaldia, Mallabiko (Bizkaia) Txondor Herri Kirol Taldearen eskutik.
- 13:00: Euskal Dantza Trintxerpe Dantza Eskolaren eskutik.
- 18:00: Donostiako Gautxori txaranga izango da jai giroan.
- 22:30: Os Melidaos Galiziar musika talde tradizionalaren emanaldia, Serafin Esnaola plazan.
Ekainak 2
- 11:30: Kalejira, Euskal Herriko Zentro Galegoen Irmandade osatzen duten Galiziako Etxeetako taldeen eskutik.
- 11:30: Gastronomia Lehiaketako produktuen harrera Gudari plazan: enpanadak, filloak eta tortillak.
- 13:30: Agintarien harrera eta pregoia, Xose Estevezen eskutik.
- 14:00: Argazkigintza, Poesia eta Gastronomia Lehiaketetako Sarien banaketa. Ermandade bazkaria Polbeiroren karpan.
- 17:30: Folklore jaialdia, Euskadiko Galizia Etxeetako Xirolarru eta dantza taldeen eskutik.
- 20:30: XXXV. Galiziako egunaren bukaera.
