Yola elkarteak 75 urte bete ditu
Urteurren hori berotzen hasteko, ekitaldi bat antolatu dute larunbatean Santiago plazan, 12:30ean. Pintxoak dastatu ahal izango dira Pasai Txarangarekin. Ekainaren 5ean, VII. Kultur Jardunaldiak hasiko dituzte.
Donibaneko Yola Kirol eta Kultur Elkartea zorioneko dago, 75 urte bete baititu. Urteurren hori herriarekin ospatuko dute, eta ekitaldi berezi bat antolatu dute larunbaterako (ekainak 1) Santiago plazan, 12:30ean. Pasai Txarangak girotuko du goiza, eta bertaratzen direnek pintxoak doan dastatzeko aukera izango dutela jakinarazi dute Yolako kideek. Larunbateko ekitaldia 75. urteurrenaren ospakizunekin hasteko “aitzakia ederra” dela adierazi dute, ekainaren 5ean abiatuko baitituzte VII. Kultur Jardunaldiak.
Yolaren Kultur Jardunaldiek lau jarduera izango dituzte. Lehena ekainaren 5ean izango da. Paco Etxeberria auzitegi mediku eta antropologoak El Valle de Cuelgamuros. Mucho más que una historia hitzaldia eskainiko du Juanba Berasategi aretoan, 19:00etan. Etxeberriak eremu horretan egindako exhumazioak izango ditu hizpide.
Ekainaren 12rako beste hitzaldi bat programatu dute Yolako kideek. David del Vallek La Bahía y sus baluartes. El castillo de Santa Isabel. La cadena hitzaldia emango du Yolaren egoitzan, 19:00etan. Gaztelu horren eraikuntza, ezaugarriak, jarduerak, erabilera edo gainbehera izango ditu hizpide.
Ekainaren 19rako jarduera “ezohiko” eta “berezi” bat prestatu dute. Yolako kideek nabarmendu dute Pasaian pasaitarren egunerokoa alaitzen zuten pertsonak zeudela, txisteak eta barreak zirela haien eguneroko ogia. Yolak keinu egin nahi die pertsona horiei, eta omendu egingo ditu. Yolaren egoitzan mokadutxo bat jateko aukera izango da 20:00etatik aurrera, eta txisteak kontatuko dituzte mahaiaren bueltan. Txiste eta umore jardunaldia izango da. Parte hartzeko aurrez izena eman beharko da, edukiera errespetatzeko.
Kultur Jardunaldiak ekainaren 27an itxiko dira Eriz Magoaren ikuskizunarekin. Mago errenteriarrak haurrei zuzendutako Auskalo ikuskizuna eskainiko du Juanba Berasategi aretoan, 18:00etan.
