Pasaia Musikalek ekainaren 17an zabalduko du matrikulatzeko epea
4 urtetik gorako pasaitar guztiek ahalko dute izena eman. Ikasturte honetan ere "musika hezkuntza inklusiboa, pertsonalizatua eta komunitatean musika sustatzearen aldekoa" eskainiko du eskolak.
Pasaia Musikal Musika Eskola 2024-2025 ikasturteari begira jarri da jada. Datorren ekainaren 17an (astelehena da) irekiko dute matrikulatzeko epea, hala jakinarazi dute gaur Aitor Brion zinegotziak eta Pasaia Musikaleko zuzendari Gorka Mirandak.
Ikasturte honetan ere “musika hezkuntza inklusiboa, pertsonalizatua eta komunitatean musika sustatzearen aldekoa” eskainiko du eskolak. Euren musika trebetasunak “ingurune eroso eta profesional batean” garatu ahal izango dituzte ikasleek.
“Gure helburua da, trebetasun teknikoak garatzeaz gain, ikasle bakoitzaren arima elikatu eta bizitza aberastuko duen musika hezkuntza eskaintzea. Gure instrumentu eta ahots ikasketen aukera zabalak, estilo klasikoetatik hasi eta modernoetaraino, ziurtatzen du musika gustu guztietarako aukerak egotea. Pianoa eta biolina, bateria eta saxofoia, txistua, gaita galiziarra eta kantua… gure programak prestakuntza integral eta moldakorra eskaintzeko diseinatuta daude”, adierazi du Aitor Brion zinegotziak. Taldeko musikak duen balioan sinisten dutela erantsi du zinegotziak eta talde lana, lankidetza eta kide izatearen zentzua sustatzen duela ikasturteko programak.
Gaurko agerraldian gogorarazi dute eskolak hastapen instrumentuak dituela doan lagatzeko, “musika hezkuntzarako sarbidea are gehiago errazteko” asmoz. Diru laguntza programa bat ere badu eskolak, “gure musika irakaskuntzetan guztion parte hartzea sustatzea helburu duena”.
4 urtetik gorako herritar orok ahalko du ikasturte berrian izena eman. “Musika edozein adinetan ikasi eta goza daitekeen arte unibertsala da. Helburua “haur, gazte eta helduentzako musika hezkuntza eskuragarri eskaintzea” dela gaineratu du zinegotziak, “ikasle bakoitzaren beharretara eta helburuetara egokituz”. Eskolan jakitun dira ikasle bakoitzak bere interes eta erritmoak dituela, eta horregatik, irakaskuntzak ikasle bakoitzari egokituko dituzte.
Instrumentu eta ahots ikasketa sorta zabala eskainiko dute aurten ere, musika estilo moderno zein klasikoak. Pianotik, gitarratik eta biolenetik hasi eta bateria, saxofoia Galiziako gaita eta kanturaino.
Taldean aritzeko aukera ere izango dute ikasleek, bandak, koruak eta orkestrak antolatuko baitituzte. Jarduera horiek “funtsezkoak” direla nabarmendu dute gaur “ikasleen garapen integralerako, trebetasun sozialak eta talde lanekoak sutatzen baitituzte”.
Ikasturte berri honetan parte hartzeko interesa dutenek lotura honetara jo beharko dute. Bestela, helbide honetara idatzi edo 943 39 60 55 telefono zenbakira deitu daiteke.
