Ekainaren 8tik aurrera, Antxoko Gure Zumardia zabalik berriro
Altza eta Galtzaraborda arteko trenbide saihesbidea egiteko okupatuta egon diren lursailen zati bat erabilgarri izango da hurrengo larunbatetik aurrera. Behin-behineko urbanizazioarekin zabalduko dute.
Datorren ekainaren 8an (larunbata da) pasaitarrek Gure Zumardia eremua berreskuratuko dute. Udalak jakinarazi berri du Altza eta Galtzaraborda arteko trenbide saihesbidea egiteko okupatuta egon diren lursailen zati bat erabilgarri izango da, Euskal Trebide Sareak bukatu baititu geltoki berria izango denaren lauzaren lanak. Hori bai, behin-behineko urbanizazioarekin zabalduko dute eremua. Mikel Garica Peñil alkateordea pozik agertu da albistearekin: “Antxotarrentzako oso beharrezkoa da Gure Zumardiko eremua, eta, gainera, oso albiste ona da herriko jaiei begira berreskuratu ahalko dugula jakitea”. Hortaz, urte hasieran iragarri bezala, aurtengo sanferminetarako barrutiko agertoki nagusietako bat berreskuratuko dute antxotarrek.
Ekainaren 8tik aurrera, beraz, “oinarrizko urbanizazioa” izango du eremuak, honako elementuekin: hormigoi zimurtuko geruza bat, behin-behineko drainatzea eta argiztapena izango dituena. Behin betiko hiri altzariak lan guztiak bukatutakoan jarriko dituzte, eta horiek non eta nola kokatuko diren erabakitzeko parte hartze prozesu bat egingo dutela jakinarazi du alkateordeak.
Aurreikuspenak betetzen badira, Gelasio Araburu kalea ere aurki zabalduko dutela iragarri du udalak, ekainaren 17an (astelehena da) izango dela aurreikusi du erakundeak.
ETSK ziurtatu du saihesbidearen obrak aurreikusitako epea betetzen ari dela, eta gaur egun Hamarretxeta eta Ibaiondo arteko goiko lauza egiteko lanekin dabiltzala. Horrez gain, Eskalantegitik hurbilen dagoen eremuan hondeaketa lanak egiten ari dira, behetik. Ibaiondon, berriz, larrialdiko aireztapenerako lanekin ari dira, eta aldi berean, Molinaoko errekastoko harlangaitzezko horma eraikitzeko lanak egiten ari dira.
Dagoeneko bukatuta dagoen Pasaia eta Altza lotzen dituen tunelaren tartean, honako lanak egiten ari dira: kontragangaren hormigoiztatzea eta hormatxo gidariak egitea. Gero, horien gainean enkofratu orga bat eutsiko dute, eta horri esker topoa igaroko den galeriaren hormigoizko estaldura egingo dute. Galtzarabordan aste honetan bertan hasi dira lehenengo metroak hondeatzen eta datozen asteetan marruskadura makinarekin ariko dira.
Altza eta Galtzarabordako arteko bi kilometroko tartea eraikitzen denean osatuta geratuko da 2016ko irailean topoa Herreratik Altzara eraman zuen trenbide bikoitzeko saihesbidea. Martxan jartzen denean 7,5 minutuko maiztasunak eskainiko dizkie topoak Pasaiako zein Galtzarabordako erabiltzaileei.
Udalak gogorarazi du Antxoko lurpeko geltoki berria Gure Zumardia kalearen ondoko plazaren azpian eraikiko dutela. Sarbidea Eskalantegi kalean izango du, eta igogailua plazan bertan jarriko dute, elizaren ondoan. Larrialdiko irteera Hamarretxea kelaren inguruan eraikiko dute. Alboko nasak izango ditu geltokiak, baina eskailerak atari bakarrera iritsiko dira, eta bertatik atera beharko da kalera. Bi nasa horiek igogailu baten bidez konektatuko dituzte.
