Arragua Berria prozesuaren ondorioak aurkeztuko dituzte hilaren 13an
Lau parte-hartze saioetan landutakoaz eta hortik eratorritakoaz arituko dira datorren ostegunean. Frontoi ondoko lokalean elkartuko dira.
Arraguan bi saio egin zituzten, etorkizuna diseinatzeko. Arragua biziberritzeko proiektua landu dute Oiartzungo Udalak eta auzoko bizilagunek. Lau parte-hartze saio egin zituzten bi aldeek, bina Arraguan eta Elizalden. Bilera arrakastatsuak izan zirela azaldu du Oiartzungo Udalak, 150 lagun hurbildu baitziren.
Egitasmoaren xehetasunak ezagutu eta hainbat gairi buruzko proposamenak egiteko aukera izan zutela adierazi du udalak. “Plazaren antolaketaz, berdeguneen diseinuaz, mugikortasunaz eta zerbitzu eta ekipamenduen beharraz aritu zen batzarretan, besteak beste”, esan dute.
Saio horietan jasotako ekarpenak aztertu ditu udalak, eta urbanizazio proiektua finkatzeko irizpideak eratorri dituzte bertatik. Lau saioetatik ateratako ondorioak partekatuko dituzte hilaren 13an, 18:30ean, auzoko frontoiaren ondoko lokalean. Datozen faseei buruzko xehetasunak azalduko dituzte bertan. Udalak iragarri duenez, zuzeneko itzulpenezko zerbitzua izango da, aurreko bileretan bezala.
Era berean, aurreko saioetara joan ez ziren auzotarrei gonbita egin diete datorren asteko ostegunekora ager daitezen.
