"Eskura ditugun tresna guztiak baliatuko ditugu etxebizitza eskuragarriagoa izan dadin"
Gaurkoa "aurrerapauso garrantzitsua" dela eremu tentsionatu izendatuak izateko esan du Aizpea Otaegi Errenteriako alkateak, baita esku hartzeko tresna gehiago izateko ere.
Errenteria-Orereta tentsio handiko eremu izendatzeko eskaera otsailean egin zuen udalak. Eusko Jaurlaritzak Errenteria-Orereta Etxebizitza Merkatu Eremu tentsionatu izendatzeko prozedurari hasiera eman diola jakinarazi eta berehala egin ditu adierazpenak Aizpea Otaegi Errenteriako alkateak: “Gaur jakin dugu Eusko Jaurlaritzak ontzat eman duela Errenteria, etxebizitzari dagokionez, eremu tentsionatu izendatzeko Errenteriako Udalak otsailean aurkeztutako eskaera”.
Argi esan du udal agintariak, gaurkoa “aurrerapauso garrantzitsua” dela eremu tentsionatu izendatuak izateko prozesuan, “baita udalerrian etxebizitzari dagokionez bizi dugun errealitatean esku hartzeko tresna gehiago eskuratzek ere”.
Oharpen bat ere egin du Otaegik, ez dela ahaztu behar, behar-beharrezkoa dela erreferentzia prezio indizea finkatzea, “eta horretarako ezinbestekoa da Gipuzkoako Foru Aldundiak beharrezko datuak Eusko Jaurlaritzaren esku jartzea”.
Otsailean eskatu zion formalki Errenteriako Udalak Eusko Jaurlaritzari udalerria tentsio handiko eremu izendatzeko; eskaera egiten lehen udalerria izan zen, gainera. Jaurlaritzaren aginduarekin, datozen egunetan herritarrek eta eragileek agindu horri alegazioak egiteko aukera izango dute, “dauden alegazioak kontuan hartuta eman beharko du jaurlaritzak behin betiko onarpena”.
Konpromiso erabatekoa azaldu du Otaegik enegarrenez, etxebizitza herritar ororentzat eskuragarriagoa izan dadin eskura dituzten tresna guzti-guztiak baliatzeko, “eta bide honek zabalduko dizkigun aukerak oso garrantzitsuak dira”.
