Labandibar saritu dute Bilbon, 'Bekatua'-gatik
Bizkaiko hiriburuko Liburu Azokaren 'Zazpi kale' saria lortu du Erein argitaletxearekin publikatutako eleberriarengatik.
Asteartean jaso zuen Zazpi Kale Saria, Bilbon [Arg.: @ereinargi]. Goiatz Labandibar idazle oiartzuarrak aitortza jaso du Bilboko Liburu Azokan. Maiatzaren 30etik ekainaren 9ra bitartean egin dute feria horren 54. ekitaldia, eta oiartzuarraren Bekatua eleberria —bere lehenengoa izan zen— saritu dute. Ereinekin argitaratu zuen, iazko urrian.
Astearte arratsaldean jaso zuen Zazpi Kale izeneko saria, Bizkaiko hiriburuko auzo bereko Bidebarrieta liburutegiaren Kulturgunean. Saria jasota, solasaldia izan zuen Karmele Jaiorekin, Maitasun eta bekatu nagusiak izenburuduna.
Bekatua liburuarekin Ramiro Pinilla eleberri laburren saria irabazi zuen 2021ean. Protagonista Garazi izeneko 36 urteko emakumea da. 19 urteko ezezagun baten ohean esnatzen da, unibertsitatean ezagutu zituen lagunekin parranda egin ondoren. Garaziren bekatua bikoitza da,: “Bikotekideari adarrak jartzen dizkio, eta, gainera, gizon gazteago batekin oheratu den emakumea da”.
Ez da Bilbon eman dioten lehen saria. 2019an Cafe Bar Bilbao Saria jaso zuen, Salaketa lanararengatik.
