San Joan suak pizteko baimena behar dela gogorarazi du udalak
Hilaren 23ko arratsean suak pizteko baimena behar da, eta hilaren 19a izango da hori eskatzeko azkeneko eguna. Astebete lehenago presta daitezke pilak.
Udako solstizioarekin batera suak piztea dagoen ohiturarik zaharrenetakoa izango da. Aurten ere piztuko dira, baina Oiartzungo Udalak gogorarazi du baimena eskatu beharko dela lehenago. Horretarako azkeneko eguna hilaren 19a izango da.
Udalak azaldu du zergatik eskatu behar den baimena: “Tokiaren egokitasuna aztertu eta ingurumenaren, pertsonen eta ondasunen segurtasuna bermatuko dela ziurtatuko du hartara udalak”. Egoitza elektronikoaren bitartez edo udaletxean bertan egin daitezke eskaerak. Eskatzailearen datu pertsonalak eta lekua zehaztu behar dira.
Astebete lehenagotik
Udalak jakinarazi duenez, hilaren 16tik aurrera egin ahal izango dira San Joan surako pilak. Egunean bertan, hilaren 23a, 20:00etatik aurrera piztu ahal izango dira.
Eremu publikoetan zein pribatuetan egiten diren suek honako baldintzak bete behar dituztela gogorarazi dute: pilatutako materialak ezin du hiru metro baino altuagoa izan; erregaiak material solidoa izango dira; sua eraikin, linea elektriko, instalazio edo objektu finko edo mugikorretik gutxienez hamabost metrora piztu behar da eta ezin da urbanizatutako lurraren gainean egin.
Gainera, norberaren ardura izango da sua itzalita dagoela segurtatzea eta ingurua txukun uztea. Irizpide horiek guztiak betetzen direla ziurtatuko dute udaltzainek.
