Pasaiako gaztetxoek ardura eskatu diete zakurren jabeei
'Zure txakurra, zure ardura' izeneko kanpaina abiatu dute lau barrutietako gaztetxoek udalarekin elkarlanean. Bi ekintza egin zituzten atzo.
Pasaiako gaztetxoek, udalarekin elkarlanean, Zure txakurra, zure ardura izeneko kanpaina abiatu berri dute. 160 bat ikasle batu dira kanpaina honetara, atzo bi ekintza egin zituzten lau barrutietan. Batetik, kalean aurkitu zituzten zakur gorotzak spray ez iraunkor batekin biribildu zituzten 45 laguneko taldetan banatuta eta bestetik, lau barrutietako komertzioetan euskarri fisiko pedagogikoak jarri zituzten, gizartea eta bereziki zakur jabeak kontzientziatzeko asmoz.
Udaleko iturrien arabera, gaztetxoen egunerokoan zakur jabe batzuen jarrerak eragina du, “batzuek txakurrak bere behar fisiologikoak egitean ez dutelako kaka jasotzen”. Horren aurrean zakurraren jabeari ardura hartzeko eskaera egin diote kanpaina honen bidez.
Ekintza honen ondoren, Pasaiako kaleetan gorotzen gaiari lotuta dagoen egoera “tamalgarria eta lotsagarria” dela adierazi dute gaztetxoek, eta ekintzak iraun bitartean herritarrek gauza bera adierazi dietela esan dute. Bizilagunek ere zakur gorotzen gaiarekin “haserre” daudela jakinarazi zieten.
“Kanpaina honen bidez, errua norena den zehaztea baino, txakurraren hondakinak jasotzen ez dituzten jabeei ardura eskatzen zaie”, diote udaleko iturriek.
Jarraian kanpainaren berri emateko udalak egin duen bideoa ikus daiteke:
