Poesia errezitaldia gazteen eskutik, hilaren 20an
Haur eta gazteen irakurketa taldeek zein herriko poetek parte hartuko dute ikasturte bukaerako poesia emanaldian. Iturriozko dorretxean izango da.
Poesia errezitaldia Iturriozko dorretxean. Poesia errezitaldia egingo dute datorren asteko ostegunean, hilak 20, Iturriozko dorretxeko ganberan, 19:00etan hasita. Haur eta gazte irakurle taldeetako kideak zein herriko hainbat poeta arituko dira errezitatzen, ikasturteari ginga jartzeko. Pello Añorgak gidatuko du saioa, eta lehenago sarrera egingo die dorretxera bertara hurbiltzen direnei.
LH5 eta LH6ko Irakurketa Taldekoek parte hartuko dute kultur jardueran. Urtero poesia liburu bat irakurtzen dute, eta poemak sortzera animatzen dituzte. Poema horiek Idoia Beratarbidek gidatzen duen gazte sortzaileen tailerrera bideratzen dituzte, eta poema bakoitzari ilustrazio bana egiten diote. Beraz, liburu bat osatzen dute Ehuntze tailerrean, testu eta ilustrazioak beltzurituta.
Emanaldian banatu ohi dute liburua. Aurtengoa hirugarren ekitaldia izango da. eta Irakurketa Taldekoek irakurriko dute datorren osteguneko errezitaldian, Edurne Saizarrek pianoan lagunduta. Horren aurretik, Karmele Mitxelena, Garazi Ugalde eta Olatz Mitxelenak poema bana errezitatuko dituzte. Bukatzeko, Malen Etxebestek eta Xabier Belaunzaranek poesia musikatua duen pieza bat eskainiko dute. Aurretik herriko beste hainbat sortzailek parte hartu dute 1545 argitaletxeak antolatutako ekitaldi horretan.
Sarrera libre izango da, eta liburua bertaratzen direnei oparituko diete.
