Donibane kaleko festak berpiztuko dituzte
Kaleko bizilagun talde batek, 52 urteren ondoren, festak antolatu ditu datorren astebururako. Ohitura zaharrak eta ekitaldi berriak uztartuko dituzte hilaren 22an, goizetik arratsera.
![donibane kaleko festak oiartzun](https://oarsoaldea.hitza.eus/site/files/2024/06/donibanekalea.jpg)
Bederatzi festa ospatuko dira aurten Oiartzunen: xanistebanak, auzoetakoak eta Donibane kalekoak. Bertako bizilagun talde baten ekimenez, hilaren 22an, «bizia bera» ospatuko dute, baita kaleari berari «bizia eman» ere. Ekaitz Zabaltza da antolakuntzan ari denetako bat. Adierazi duenez, kalean bizi zen jende zaharrarekin harremanetan jarri ziren, festak nolakoak ziren jakiteko. Ekitaldi batzuk berreskuratu dituzte, eta berri batzuk erantsi, kalea «girotzeko». Hala ere, kosta zaiela aitortu du Zabaltzak. «Kaleko festen oroitzapena mamu bat bezalakoa da. Jende askok ez zekien bazeudenik ere. Helduek bai, baina ez da transmititu», adierazi du.
Lekuko materialei dagokienez, argazki bakarra aurkitu dute, 1952ko asto lasterketarena. Inazio Basosoro Gordioz astoaren gainean agertzen da, Martikone etxea zenekoan. Bertako bizilagunen bitxikeriak jaso dituzte, handik eta hemendik, eta erakusketatxo bat egiteko materiala lortu dute, argazki zaharrekin apainduta.
Azkeneko festak 1972. urtean egin zituzten: asteburu osokoak izan ziren ospakizunak orduko hartan, ostiralean hasi —San Joan bezpera— eta iganderaino.
Xaflak eta begiztak
Kalean hamar etxe daude, eta egurrezko xafla bana emango diotela jakinarazi du Zabaltzak. Etxearen izen historikoa adieraziko du bakoitzak, eguzkilore batekin. Izenen zerrenda Joxe Mari Mitxelena Axeya-k pasatu die, elizako erregistroan jasota dauden izenekin.
Materiala jasotzean, altxor bat topatu dute. Kaleko bizilagun batek 1956ko festetarako ahizpak brodatu zuen begizta bat jaitsi zien antolatzaileei, Oyarzun, Hermanas Iriarte idatziekin, eta urte hartako San Joan Eguneko data dituena. «Beraiek ere poztu ditu norbaitek interesa agertu duelako. Jaitsi zigunak oroitzapen oso ona du, eta ziurtatu du xanistebanak baino hobeak zirela». Begiztaren kopia egingo dute, egungo grafiarekin eta data eguneratuta.
Kasualitateak beste egoera bitxi bat sortu du. Zurrounk-ek joko du bihar, eta taldeko abeslarietako baten aitonaren anaia Donibane kaleko festen antolatzaile nagusietako bat izan zen. «Modu horretan, nolabaiteko transmisioa ematen da». Ea biharko belaunaldiek ere aurtengoen lekukoa jasotzen duten.
Egitaraua
- 10:00etan. Diana, Oidultzen eskutik.
- 11:00etan. Bisita gidatua San Joan kaperara, Elena Zalakainen eskutik.
- 11:00etan. Neska gazteen pilota partidak, Kontzejupean.
- 11:00etan. Mutxikoak, Donibane kalean.
- Beste ekitaldiek irauten duten bitartean. Kaleko hamar etxeen izena daramaten egurrezko plaken banaketa.
- 13:00etan. Kaleko bikote zahar bat omenduko dute, dantzari gazteen eskutik.
- 13:30ean. Bermuteoa, abestuz.
- 16:30ean. Horrekin pintxoa opari Mirenen, eta inguruko establezimenduek emandako 11 sariren zozketa. Aurretik salduko dituzten zapiekin batera emango dute zenbakia.
- 17:00etan. June Galardiren kontzertua.
- 18:30ean. Zurrounken emanaldia.
- Egun osoan zehar. Kaleko argazki zaharrak, Miren tabernan, Maritxu arrandegian eta kaleko paretetan.