Auzoko festetan hondakinei buruz sentsibilizatuko dute
Kanpaina bat abiarazi du Oiartzungo Udalak, auzoetako jai batzordeen konplizitatearekin. Helburua festan parte hartzen dutenek hondakinak egoki biltzea da.
Edalontzi berrerabilgarriak dira hondakinak murrizteko bideetako bat. Hondakinei buruz sentsibilizatzeko kanpaina abiaraziko du Oiartzungo Udalak. Oraingoan, auzoetako festetan sortzen diren hondakinen gaineko lanketa egin nahi dute. Gogorarazi dutenez, duela hamalau urte jarri zuten abian gaikako bilketa. Ordutik, helburua izan da ahalik eta hondakin gutxien sortzea, eta sortzen dena modu egokian bereizi eta jasotzea.
Herriko zein auzoetako festetan horren isla direla adierazi dute, edalontzi berrerabilgarriekin edo hondakinak gaika biltzeko guneekin, esaterako.
Beste urrats bat egin nahi dute, kanpaina berriaren bitartez. Atez ateko bulegoko koordinatzaileak adierazi duenez, hondakinekiko kontzientzia sendotzea da helbru, txokoak txukun mantentzen diren bitartean.
“Hondakinak denok sortzen ditugu eta denon ardura dira. Denoi dagokigu inguruko berdegune, parke eta espazioak txukun mantentzea; zabor-ontziak gainezka badaude gure hondakina lurrean ez uztea edota botata utzitakoa biltzen laguntzea”, adierazi du.
Festa batzordeetakoak, konplize
Auzoetako zein herriko festetako festa batzordeetako kideak konplize izango dira kanpaina horretan. Jakinarazi dutenez, bilketa lanetarako beharrezko baliabide guztiak eskura jarriko dizkie udalak. Horrez gain, taldeko hainbat lagun arduratuko dira bilketa lanekin hasteaz eta gainontzeko herritarrak xaxatzeaz. “Asmoa da antolakuntzakoak hondakinak biltzen dabiltzala ikustean, festara hurbildu diren pertsonak beraien hondakinaz arduratzea eta ondorioz, ingurua txukun mantentzea”, adierazi du atez ateko bulegoaren koordinatzaileak.
Hala, udalak azpimarra egin nahi du guztien inplikazioan. Ohiko garbiketa zerbitzuez gain, herritarren parte-hartzea “ezinbestekotzat” dute: “Guztion elkarlanari esker lortu nahi dute herria txukun mantentzea”.
