Bost industriagune "estrategiko" berritu ditu Oiartzungo Udalak
4.500.000 euro inbertitu dituzte "eraberritze integralak" egiteko. 7.000 lagunek egiten dute lan herriko industriaguneetan.
Joana Mendiburu alkatea eta Agustin Lekuona Hirigintza zinegotzia. Herriko bosgarren industriagunea eraberritu du Oiartzungo Udalak. Ekonomia eremu horiek garrantzitsuak dira udal erakundearentzat, herriko industriaguneetan 7.000 lagunek egiten baitute lan, baita estrategikoak ere. “Bertan dauden enpleguak eta enpresak mantendu eta proiektu integralak erakarri nahi ditugu”, adierazi dute. Horregatik, herriko ekonomia eremu horiek biziberritzeko “plan integrala” osatu zuten, eta orain bukatu dute.
Duela gutxi bukatu dituzte Ugaldetxoko industrialde osoa eraberritzeko lanak. Bi fasetan egin dituzte lanak, eraberritze sakona egin behar zuela zehaztu baitu udalak. Azpiegiturak, argiteria eta sarrera-irteerak hobetu, oinezko bideak egin eta barneko udal errepideak konpondu dituzte.
4,5 milioi euroko inbertsioa
Ugaldetxoko industriagunea biziberrituta, azken urteetan bost industriagune berritu dituzte. Udalak gogorarazi duenez, Makarraztegi, Oiartzun eta Lanbarren egokitu zituen duela bi urte eta Lintzirin ere guztiz berritu zuen aurretik.
Inbertsioa 4,5 milioi eurokoa izan da. Udalak 1.900.000 euro jarri ditu, eta beste administrazioen artean 2.000.000 euroko ekarpena egin dute. Enpresa batzuek ere ekarpena egin dute, 600.000 eurokoa.
Txukunketa gehigo
Bost industriaguneez gain, Lanbarren eta herriko beste industriagune txikiagoak —Talaia eta Altzibar— txukuntzeko lan gehiago egin dituzte.
“Aurrera begira ere”, azaldu du udalak, “lehentasunezkoa izango da Udalarentzat industrialdeak bizirik eta egoki mantentzea, herriko eta eskualdeko enplegua eta ekonomia sustatzeko gune estrategikoak izaten jarrai dezaten”.
Bide horretan, Lanbarren industriagune osoa berritzeko proiektu “garrantzitsua” dute esku artean. Jakinarazi dutenez, beste hainbat administraziorekin harremanetan jarri dira, diru-partidak lortzeko asmoarekin.
