Antzerki eskolan aurrematrikula egin dezakete heldu eta gazteek
Oiartzungo antzerki eskoletan izena emateko aukera zabaldu dute, uztailaren 2ra arte. DBH 1 eta aurrerakoek eman dezakete izena.
'Amonaren testamentua' antzezlana, Gazteen taldeek egindakoa. Oraintxe bukatu da ikasturtea, baina 2024/25erako prestatzen ari dira Oiartzungo Antzerkizaleen Elkartekoak. Datorren ikasturterako aurrematrikula egin daitekeela jakinarazi dute, eta horretarako, beraien webgune berritutik pasa daiteke.
DBHn dauden ikasleek eman dezakete izena, baita Batxilergoa egiten ari diren gazteek —edo adinkideek— ere. Helduen taldean ere izena eman daiteke. Informazio gehiago aurki daiteke webgunean bertan, eta honakoa adierazten dute bertan, gazteen taldeari buruz.
Haurren mundutik abiatuta, gaztetasunean sartzen garen bidaian, adierazteko ipuin, istorio, gai eta modu berriak behar ditugu. Taldearen heleburu eta oinarria hori izango da. Taldearen eta norbanakoaren nahiak, behar eta gogoak kontutan izanik, lanketak egingo dira, gorputz adierazpenaren bidez lotsak galdu eta gaztearen adierazpen gaitasuna erakusteko. Inprobisazioen bitartez, pertsonaiak, istorioak asmatu asmatu eta antzerki-piezak sortu.
Aurrematrikulazio kanpaina aprobetxatu dute gogorarazteko aurtengo emanaldietan ateratako argazkiak jaisteko aukera dagoela.
