Kopla Txapelketa antolatu du Oiartzun Irratiak
Uztailaren 13an ospatuko dute Oiartzun Irratiaren 25. urteurrena, eta egun horretan bertan jokatuko dute Kopla Txapelketaren finala.
Kattalin Arabolaza Palomo, Egiar Otegi Torres eta Peru Alijostes Iratorza. Oiartzun Irratiak bertsolaritzari buruzko saio berri bat egin du: Aitziyo. Irratigintzan hasi berriak diren hiru gaztek egiten dute saioa, baina bertsotan adituak dira denak: Kattalin Arabolaza Palomo, Egiar Otegi Torres eta Peru Alijostes Iratorza dira (irudian). Uztailaren 13an Oiartzun Irratiak 25. urteurrena ospatuko du, eta egun horretan amaituko den Kopla Txapelketa jarri dute martxan.
Hamabost egunean behin hitz edo gai baten berri ematen dute irratian, eta parte hartzaileek gai hori ardatz izanda kopla bat bidali beharko dute irratiko WhatsApp edo Telegramera (683 37 96 19). Koplak bakarka edo taldeka abestu daitezke, eta urteurrenaren egunean hitz bakoitzeko kopla originalenek finala jokatuko dute.
Irratikoek aurreratu dutenez oiartzuarrak izango dira irabazlea aukeratuko dutenak, eta finalera iristen diren guztiek izango dute saria.
Pasa den hamabostaldiko hitza Irratia izan zen, eta hitz berria -ekainaren 28. bitartean- Euskara izango da.
