Arrakastatsua izan da Xoxolur Mendi Klubaren azken irteera
Bederatzi irteera egin dituzte ikasturtean, eta dagoeneko eman dute datorrenaren berri: Irailaren 21eko asteburuan Pirinioetara joango dira.
Pasa den igandean egin zuen Xoxolur Mendi Klubak denboraldiko bederatzigarren eta azken irteera. Orotara 50bat haur eta heldu joan ziren, eta denek mendiaz, itsasoaz eta buelta ondorengo bazkariaz gozatzeko aukera izan zuten. Mendi ibilaldia Lezon hasi zen, eta Donibaneko Mintxintxolara gainera igo ziren bertatik.
Gainera, mendi bueltaren antolatzaileek sorpresa bat zuten: Jaizkibelgo 2. Dorreko sarrera. Mendizaleek dorrera sartzeko giltzak zituzten, eta eskailerak igo ondoren partaide guztiek naturaz eta inguruaz gozatzeko aukera paregabea izan zuten.
Jarraian, ibilaldiaren mendiko zatia amaituta, Donibanera jaitsi, eta Pasaia nahiz Lezo (eta Errenteria-Orereta) batzen dituen badiatik zehar itsasontzi zeharkaldia egin zuten. Xoxolur Mendi Klubekoen hitzetan olatu handi samarrak zeuden itsasontzian zeuden bitartean, eta hamaika abentura bizi izan zituzten ur gainean. Behin ibilbidea amaituta, Aizpea ostatuan bazkaldu eta sari banaketa egin zuten.
Datorren irteera irailaren 21-22ko asteburuan egingo dute, Pirinioetara. Laster zabalduko dute informazioa, izen ematea uztailaren hasieran izango baita.
