Ostiral arratsean erabakiko da Herriartekoaren finalista nor izango den
Oiartzunek Beasainen jokatuko ditu esku huskako Herriartekoaren finalerdietan itzuliko partidak. Abantailarekin joango dira.
Antzizar pilotalekuan jokatuko dute loriarako txartela. Asteburu hau erabakigarria izango da Oiarperentzat. Klubeko pilotariek ordezkatzen dute Oiartzun esku huskako Herriartekoan, eta hirugarrena jarraian lortu nahi dute.
Horretarako, baina, Beasain garaitu behar dute lehendabizi. Joaneko partidetan abantaila lortu zuten oiartzuarrek. Itzuliko norgehiagoken eguna eta ordua zehaztu dute: bihar jokatuko dituzte, Beasaingo Antzizar pilotalekuan, 18:45ean hasita.
Ohi bezala, kadeteak hasiko dira lehian, jubenilek jarraituko dute eta nagusien partidarekin bukatuko da. Oiartzuarrek 2-1eko emaitza lortu zuten, eta hogei tantoko aldea, eta hori balia dezakete.
Aurreko bi ekitaldietan txapeldun izan ziren oiartzuarrak, eta hirugarrena jarraian lortu nahi dute. Aurretik beste bat irabazi zuten. Finalera iristekotan, hurrengo asteburuan jokatuko dute.
Bestalde, Oiarperen kartelera osatzeko, partida bakarra izango da. Galardik jokatuko du, larunbat goizean, Villabona-Amasan, 11:00etatik aurrera. Nesken Haur Mailako Gipuzkoako finala izango da, eta Alde Zaharra taldeko Rey izango du arerio.
