Oiartzun Irratiak 25. urteurrena ospatuko du uztailaren 13an
Egun osoko egitaraua antolatu dute uztaileko bigarren larunbaterako. Bazkarirako txartelak salgai daude irratian eta Landetxen.
Oiartzun Irratiak hogeigarren urteurrena bete zueneko bazkariaren irudia. San Fermin Egunean beteko da mende laurden Oiartzun Irratiaren lehen emanalditik. Irratiaren lehenengo 25 urteak ospatzeko asmoz, egun osoko egitaraua antolatu dute irratikoek. Duela bost urte bezala, FM 106.5 uhin-luzerak ehuntzen duen komunitatea elkartzea izango da helburua.
Hainbat ekitaldi antolatu dituzte, eta horietako bat izango da bazkaria. Oiartzuar guztiak gonbidatu dituzte bertan parte hartzera, eta sarrerak salgai daudela jakinarazi dute. Irratitik pasa daiteke horiek eskuratzera, edo Landetxe tabernara joan. Helduentzako txartelen prezioa 15 eurokoa izango da, eta haurrentzakoa, 8 eurokoa.
Egitaraua
- 11:00etan: Haurren txokoa, Kontsejupe plazan: Puzgarriak, aurpegi margotzea…
- 12:00etan: Herri kirol desafiyua, Oiartzungo beterano eta gazteen artean.
- 13:30ean: Ekitaldia, Done Eztebe plazan.
- 14:00etan: Bazkari herrikoia, Done Eztebe plazan.
- Bazkaldu ondoren:
- Kantaldia.
- Kopla txapelketako finala.
- Bingoa.
- 17:30ean: Dantzall Sound eta Mxk3r-en kontzertuak, plazan.
- 19:00etan: Tio Teronen Semeak, Landetxe plazan.
