Pasaia eta Red Bay herriaren arteko senidetzak sendotzen jarraitzen du
Ongietorri beroa egin zioten atzo Kanadako "ordezkaritza adierazgarri" bati. 2017an ezarri zuten bi herrien arteko senidetze harremana, ordutik sendotzen jarraitzen duena.
Pasaiako eta Kanadako ordezkariak, atzoko ongietorrian. Atzo (hilak 19), Kanadako ordezkaritza “adierazgarri” bati ongietorri beroa egin zioten udalean, 2017an Labradoreko (Kanada) Red Bay herriarekin ezarritako senidetze harremana “sendotzearren”. Bi komunitateen arteko “loturen garrantzi historikoa eta etorkizunekoa” nabarmendu zituen Aintza Taberna alkateordeak. Udal gobernuko kideak, PSE-EE taldeko ordezkariak, Kanadako enbaxadore eta ministroak, Espainiako Kultura Ministerioko legebiltzarkideak eta Albaola Itsas Kultur Faktoriako kideak izan ziren atzoko ongi etorrian.
“Sinbolismo bereziko” jardunaldia izan zela nabarmendu zuen Tabernak: “Gaur oso egun berezia da Pasaiarentzat, Kanadako ordezkaritza berezi bati ongietorria emateko ohorea baitugu. Bisita hau Labradorreko Red Bay-rekin dugun harremanaren isla da, 2017an formalizatutako gure senidetzari esker”, esan zuen. Bi herrien arteko “lotura historiko sakona” nabarmendu zuen alkateordeak, eta aipatu zuen Pasaia izan zela euskal baleontzien abiapuntuko portu nagusia, eta Red Bay, berriz, harrera portu nagusia. “Lotura historiko horiek indartu egin ziren Unescok 2013an Red Bay Gizateriaren Munduko Ondare izendatu zuenean, eta 2015ean San Juan baleontziaren erreplikaren eraikuntza babestu zuenean”, erantsi zuen.
Gainerako ordezkariek nabarmendu zuten “Pasaia eta Kanadaren arteko lankidetza kultural eta diplomatikoaren garrantzia”, eta bi herrien arteko lankidetzari balioa eman zioten. NunatuKavut komunitatearen izenean, Tod Russellek bi eskualdeetako kultura eta natura ondarea babestu eta sustatzearen garrantzia nabarmendu zuen, “komunitate indigenen tradizioak eta ezagutzak errespetatu eta baloratuko dituen lankidetzaren esparruan”.
Ongietorriaren ondoren, partaide guztiak aldundira joan ziren, Nao San Juan Kanadarako bidean komitearen lehen bilerara. Foro honen helburua, udaleko iturrien arabera, “San Juan euskal baleontziaren berreraikuntzaz eta 2026an Kanadara egingo duen inaugurazio bidaiaz hausnartzea” da. Bidaia horrek bi herrien arteko lotura historiko eta kulturalak sinbolizatuko ditu.
