San Joan suak, barrutiz barruti
Igandean suek gaua argituko dute lau barrutietan. Suren bat piztu nahi dutenek aldez aurretik udalari jakinarazi beharko diote.
Igande honetan (hilak 23) San Joan suek gaua argituko dute Pasaian ere. Lau barrutietan egingo dituzte suak. Donibaneko plazan, San Pedroko Torrean, Antxoko Gure Zumardian eta Trintxerpeko Gernika plazan izango dira horiek. 22:00etan izango dira suak, baina Trintxerpen 20:00etan ere sua piztuko dutela aurreratu dute, Gudarien plazan.
Igandean “pertsonei eta ondasunei sor dakizkiokeen kalteak saihestearren”, San Joan sua egin nahi dutenek aldez aurretik udalari jakinarazi behar diotela gogorarazi du udalak. Eskaerak Herritarren Arretarako Zerbitzuaren (HAZ) bitartez egin beharko da, edo bestela, Udalaren Egoitza Elektronikoaren bidez. Adinez nagusia den arduradun baten datuak eman beharko dira.
Jarraian, udalak “segurtasuna ziurtatzeko” eman dituen gomendioak:
- Ez da surik egingo etxebizitzetatik, ibilgailuetatik eta sasietatik gertu. Gutxienez 15 metroko tartea utziko da, edo suaren altuera halako bostekoa. Ez da surik egingo zuhaitzen azpian, edo linea elektriko edo telefonikoen azpian.
- Sua asfaltatutako edo harriztatutako eremuetan egiten bada, estali beharreko azalera gehi bost metro babestu behar dira, gutxienez, hamabost zentimetroko lur edo harea geruza batez.
- Sua pizteko papera, lasto lehorra, ezpalak edo barbakoako pastillak bakarrik erabil daitezke.
- Ez da sutara bota behar material sukoirik (gasolina, pinturak, disolbatzaileak…).
- Ez dira sutara bota behar pneumatikoak, goma-aparrak, plastikoak, aerosol-potoak, eta lehertu edo ke toxiko edo kaltegarriak isur ditzaketen materialak.
- Ez da etxeko-tresnarik edo altzaririk bota behar.
- Ez da bota behar haizeak arrastaka eraman dezakeen paper, kartoi, oihal edo belarrik, sutea zabal ez dadin.
- Sutik gertu izan behar dira ur-mahuka, su- itzalgailua edo sua jotzekoa.
- Sua itzali arte zaindu behar da, eguraldi aldaketaren bat gertatzen bada ere (haizea).
- Suaren arduraduna beti sutik gertu egongo da, eta lekua utzi aurretik ziurtatu behar du ez dela txingarrik geratzen. Sua hozteko ura erabil daiteke, edo sua lurrez edo hareaz estali.
