Xanistebanetako mus eta toka txapelketetan izena emateko epearen berri eman dute
Kartetan uztailaren 23an arituko dira, eta punteria-jokoan, abuztuaren 5ean. Uztailaren lehenengo hamabostaldian eman daiteke izena.
Abuztuaren 5eko toka txapelketa klasiko bat da xanistebanetan. Xanistebanetarako hilabete eta erdi inguru falta da, eta herriko eragile askok data horiek dituzte buruan. Gazte Izanak jubilatu eta pentsiodunen elkarteak txapelketa pare bat antolatu du udarako, eta izen-emate epea zabalik dagoela jakinarazi dute.
Bi kasuetan, Landetxeko lokaletatik pasatu beharko da izena ematera, uztailaren 1etik 16ra. 10:00etatik 13:00etara bitartean pasa daiteke bertatik. 18 urtetik gorako oiartzuarrek parte hartu ahal izango dute txapelketa batean zein bestean.
Lehenengoa mus txapelketa izango da. Uztailaren 23an jokatuko dute, 17:00etatik aurrera, Landetxeko lokaletan. Toka txapelketa, berriz, xanistebanetan bertan jokatuko dute, abuztuaren 5eko goizean, 11:00etatik aurrera, Landetxeko bolatokian. 11:00etan hasiko dira punteria frogatzen. Egun bertan ere eman daiteke izena.
Mus txapelketan zein tokakoan sari “zoragarriak” izango direla jakinarazi dute.
