Aldaketaren protagonistak direla erakutsi dute gazteek
Mater-ek bultzatutzako Itsas Hondakinen Erronka proiektuaren bukaerako ekitaldia egin zuten atzo. 10 proiektu saritu zituzten, horietako bi Pasaiakoak.
Mater Ontzi Museo Ekoaktiboak bultzatutako Itsas Hondakinen Erronka: Gazteak Aldaketaren Protagonistak proiektuaren bukaerako ekitaldia jaso zuen atzo Donibaneko Juanba Berasategi aretoak. Hamarka ikasle bildu ziren atzo, proiektu honen baitan sortu dituzten 10 proiektu onenak aurkeztu eta saritu zituzten. Hauen “originaltasuna eta eraginkortasuna” nabarmendu zituzten atzoko ekitaldian.
Zazpi ikasturte darama museoak Gipuzkoako bederatzi ikastetxeetako 2000 ikasle baino gehiagorekin lanean, eta itsas hondakinen arazoari aurre egiteko tokian tokiko 500 proiektu garatu dituzte urte hauetan. Aurtengoan 400 ikasle aritu dira, eta 107 proiektu aurkeztu dituzte, Mater-eko iturrien arabera, “ingurumenaren zaintzako ekintzaile izanik eta aldaketaren protagonistak direla frogatuz”. Pasaian, Lezon, Errenteria-Oreretan, Donostian, Tolosan eta Astigarragako ikasleek jaso dute sariren bat.
Epaimahaiko kideak aurtengo proiektuekin “benetan harrituta” geratu direla aitortu dute, “garatu diren proiektuen kalitate handiarengatik, hondakinen murrizketa proiektu kopuruarengatik, herriko eragile ezberdin asko inplikatu dituztelako, eta komunikazioari indar izugarria eman diotelako”.
Pasaiako proiektuen artean, Pasaia Lezo Lizeoko ikasleek egindako Mundua lagundu dezagun izeneko liburua saritu zuten atzo, ingurumen arazoak zein ingurumen zaintzan mundu mailako erreferente eta erronkak lantzen dituena. Pasaian garatutako eta saria jaso zuen beste proiektua Plastikoekin eskulanak egitasmoa izan da, plastikozko hondakinei berrerabilpena egiteko tutorial zein tailerrak garatu dituzte. Errenteria-Oreretako Telleri Alde ikastetxeko ikasleek ere sari bat jaso dute, Guztion erreka guztion erronka proiektuagatik. Oiartzun ibaiko puntu beltzean hondakin bilketa herrikoia antolatu dituzte eta honen emaitzak zabaltzeko informazio puntua jarri dute.
Proiektu guztiak esteka honetan ikus daitezke. “Hunkitu egiten gara urtero gazteek aurrera eramaten dituzten proiektuekin, aukera eta prestaketa emanez benetako aldaketaren protagonista izateko gai direla frogatzen dute, oso harro gaude”, adierazi zuen atzoko ekitaldian Sara Lizarza Mater-eko hezkuntza proiektu honen arduradunak.
‘Plastikoen eskulanak’ proiektuaren sortzaileak.
