Karla Lekuona zelaia itxuraldatzeko lanak hasiko dituzte abuztuan
Belar naturaleko zelaia artifizial bilakatuko dute, eta argiterian zein sarreran moldaketak egingo dituzte OKEren gotorlekuan.
Edorta Fernandez eta Olaia Lasa zinegotziak, aldatuko den soropilean. Karla Lekuona futbol zelaiak 47 urte beteko ditu aurten. Oiartzun Kirol Elkartearen gotorlekua da Ugaldetxoko zelaia, eta erabaki dute eraberritu egin behar dela. Izan ere, OKEn 160 emakume eta 315 gizon aritzen dira gaur egun futbolean. 21 talde ditu, kimuetatik hasi eta senior mailara bitarte.
Ezin kabituta ibiltzen dira, belar naturaleko zelaia ezin baita nahi bezain bestetan erabili, soropila ez lokazteko. Gainera, mantenu-lan handia behar du. Horregatik, belar mota aldatzea erabaki dute, artifiziala jartzeko.
Kirol-instalazioa hobetu eta erabilera eta segurtasuna handitzeko, belar naturala kendu eta belar artifizialeko zelaia egingo da. Futbol 11rako joko-eremu bat eta futbol 7rako bi markatuko dituztela jakinarazi du udalak. Ureztatze eta drainadura sistema berriak jarriko dituzte eta zelaia inguratzen duen hesia aldatuko dela gaineratu dute.
Ekipamendu berriak
Udalak nabarmendu duenez, belar berriari esker mantenu-lanak eta kostuak “nabarmen” murriztuko dira. Soropilaz gain, zelaiaren beste hainbat ekipamendu ere eraberrituko dituzte.
Lau argiztapen-dorre eraikiko dituzte, zelaiaren lau izkinatan. Bakoitzak LED motako launa proiektore izango ditu, energia-eraginkortasuna hobetzeko. Sarrerak eta leihatila berria egingo dira eta markagailua, babes-sarea eta taldeentzako aulkiak aldatuko dituzte.
Zelai barruan ez ezik, kanpoaldean ere izango dira berritasunak. Joko-eremua eta errepidearen arteko itxitura atzeraeman, eta bertan espaloia eta autobusentzako aparkalekua egokituko dituzte.
1.834.000 euroko aurrekontua du eraberritzeak. Abuztuan hasiko dituzte lanak eta ondo bidean, zelai berria urte bukaerarako prest egongo dela kalkulatu dute. Tarte horretan, zelaia aldi baterako itxita egongo da eta Zubietan eta Lezon jokatuko dituzte futbol partidak.
47 urte
Oiartzun Kirol Elkartea 1975ean sortu zen, eta datorren urtean beteko du mende erdia, zelai berriarekin. Lehen bi urteetan Mamut inguruko zelaietan ibiltzen ziren entrenatzen eta kanpoan jokatzen zituzten partiduak, eta ondoren eraiki zuten egun Karla Lekuona izena daraman zelaia.
Oiartzun Kirol Elkarteak zelai zaharrari agur esateko ekitaldia egin zuen maiatzeko azkeneko larunbatean.
