Lehenbiziko Kirol Eguna giro paregabean egin da
Hiriko kirol eskaintzaren ikusgarritasuna lantze aldera, Gernika plazan bildu dira herriko 8 eta 14 urte bitarteko gazteak. Bost kirol diziplinatan aritu dira.
Kirolaren Eguna egin dute gaur lehenbiziko aldiz Gernika plazan. Errenteriako Udalaren eta herriko hainbat kirol eragileen ekimena izan da, eta pilota, eskubaloia, saskibaloia, mahai tenisa eta errugbia gertu-gertutik ezagutzeko aukera izan dute 8 eta 14 urte arteko haur eta gazteek. Giro ederrean joan da goiza. Gazte batzuek oso argi dute zein den maite duten kirola, baina beste batzuk, kirol batetik bestera jauzi egiteko probestu dute goiza.
Helburu nagusia herritarrek hirian dagoen kirol eskaintza zabalaren berri izatea izan da. Bost diziplina probatzeko aukera izan dute, nahiz eta herrian eskaintza handia den. Dena den, hiriko diziplina guztiak probatzeko leku falta dago plazan, eta urtez urte denei ikusgarritasuna ematen saiatuko dira.
Gernika plazan sei gune izan dira, jarduerako bana. Pilotan jokatu ahal izateko, egurrezko pareta jarri dute eskubaloi kantxaren atzean. Kirol anitzeko pistan berriz, eskubaloi eta saskibaloian aritu dira, eta plazaren beste guneetan berriz, errugbian eta mahai tenisean aritzeko espazioak egon dira.
Kirolariak 10:00etatik 13:00etara egon dira elkarrekin. Bertan izan dira, Ereintza eta Oiarso taldeak, Orereta Rugby, EPLE pilota eskola, eta Beraun Errenteria mahai tenisa.