Harrobi erakustaldia egin du gaur Sanpedrotarra Arraun Elkarteak
Arraunlarien aurkezpena egin du Sanpedrotarra Arraun Elkarteak. Harrobia motor bilakatzeko urratsak egiten ari da kluba, Xabier Isasa presidentea bidelagun.
Sanpedrotarra Arraun Elkarteak 2024ko arraunlarien eta traineruaren aurkezpena egin du gaur Torreko plazan. Aurkezpenean izan dira herritarrak, Teo Alberro Pasaiako alkatea eta San Pedroko alkateorde Miguel Mari Torrea, eta Xabier Isasa Sanpedrotarra Arraun Elkarteko presidentea.
Isasak adierazi du kluba “ondo estrukturatzea” dela taldearen oraingo helburua: “Azpiko kategoriak ongi landu eta hortik abiatu. Klubari etorkizun oparoa bermatu nahi diogu eta gure helburua da epe luzera eta motzera begira egotea”. Klubera jende asko gerturatzen ari dela azken aldian nabarmendu du, eta hori “oso positiboa” dela uste du presidenteak. “Klub erakargarri bat izatera iritsi behar dugu”.
Egun, San Pedrok sei talde ditu. Bat: Haur Mailako mutilak, Iñigo Velascoren aginduetara, Gipuzkoako Batel Liga irabazi dute. Bi: Haur Mailako neskak, Oihane Santos eta Amaia Muguruza entrenatzailearen laguntzarekin, haiek ere herrialdeko liga irabazi dute. Hiru: neska kadeteak, Maialen Muguruza entrenatzailearekin. Lau: mutil kadeteak, Josu Hidalgo eta Unai Mayoren gidaritzapean. Bost: Gazte Mailako mutilak, Iñigo Osa eta Mikel Txintxurreta entrenatzaileekin izan dira argazkian. Sei: Senior mutilak, edota Libia traineruko kideak.
Gaurko irudia “oso polita” dela dio Isasak, baina lanean segitu behar dutela gaur erakutsitakoa mantentzeko. “Sinesten baldin badugu, iritsiko gara”, amestu du presidenteak. Gaurkoa, “ondare erakustaldia” dela adierazi du, harro. Horrez gain, udara “gogorra” izango dela oroitu die arraunlariei, eta bertan egongo dela ziurtatu die presidenteak, Libia Eusko Label Ligara itzuli baita: “Nire babesa eta laguntza emateko prest nago, eta ziur nahiz maila txukuna emango dugula. Aupa San Pedro eta aupa Libia!”.
Hiruzpalau urtetan emakumeen senior taldea sortzea da talde morearen xedeetako bat. Dagoeneko kadete nesken taldea dute sanpedrotarrek eta “harrobia motorra” bada, emakumeen Libia ontzia Pasaiako badian ikusiko denaren itxaropena du Isasak. Bestalde, gizonezkoen trainerua Eusko Label ligan arituko da aurten eta “ilusioarekin” daudela aitortu du presidenteak. Asteburu onak eta txarrak izango dituztela uste du Isasak, baina lehiatzeko eta ikasteko prest daudela ziur da.
Alberro alkateak, berriz, eskertze mezuak izan ditu. “Eskertzekoa da arraun elkarte honek egiten duen lana, ez delako batere erraza horrelako talde bat osatzea. Eskertzea egindako lana, baita ere harrobia mantentzea eta lantzea ere, garrantzitsua delako. Harrotasunez defenda dezatela San Pedroko bandera. Ea ahalik emaitza eta bandera gehien lortzen dituzuen”.
Jarraian, gaurko aurkezpeneko hainbat irudi.
