Bi txapelek biribildu dute Oiarperen asteburu bikaina
Larraitz Galardik Villabonan eta Eraunzetamurgil eta Etxeparek Beran lortu dituzte txapelak, Herriarteko balentriari gehitzeko.
Larraitz Galardi, larunbatean, Gipuzkoako txapelarekin. Bikain hasi zen asteburua Oiarpeko pilotarientzat, eta bikain bukatu da. Ostiralean Herriarteko Txapelketaren finalera iristea lortu zuten oiartzuarrek, Beasainen. Kartelera ez zen aurrekoetan bezain zabala, baina egin beharrekoak ongi egin zituzten.
Larunbat goizean, Beran, Oinatz Erauntzetamurgil eta Oihan Etxeparek osatutako Oiarpeko bikoteak Bortzirietako Txapelketako Haur Mailako finala irabazi zuen, taldekide bat —Anuntzibai— eta Lazkanotegi eskualdeko pilotariaren kontra. 18-7 nagusitu ziren oiartzuarrak.
Egun berean, beranduxeago eta Villabona-Amasan, Larraitz Galardik Gipuzkoako Banakako Txapelketako finala jokatu zuen, Haur Mailan baita ere. Oiarpeko pilotariak txapela janztea lortu zuen. Alde Zaharra Donostiako taldeko Arhane Reyren kontra neurtu zituen indarrak oiartzuarrak, eta 2-1 irabazi zion.
Herriartekorako sarrerak
Asteburu honetako bide honetatik jarraitu nahi dute hurrengoan. Datorren larunbatean, hilak 30, Herriarteko Txapelketaren finala jokatuko dute, 16:30ean hasita. Donostiako Atano III.a pilotalekuan izango da hiru partiden sorta.
Sarrerak bihar —asteartea— eta ostegunean salduko dituzte, Oiarperen bulegoan. 18:00etatik 20:00etara bitartean izango dira salgai, Madalensoroko goiko aldean dagoen bulegoan.
Oihan Etxepare eta Oinatz Erauntzetamurgil, Berako txapelak jantzita.
