Hondakinak biltzeko neurri gehiago hartzeko eskatu du Ezker Anitza-IUk
Pasaiako udal gobernua izapidetzen ari den Etxe eta Merkataritza Hondakinen Udal Ordenantza "anbizio gutxikoa" dela uste du taldeak. Testu hori hobetzeko asmoz alegazioak aurkeztu dituzte.
Pasaiako Ezker Anitza-IU taldeak alegazioak aurkeztu berri dizkio udal gobernua izapidetzen ari den Etxe eta Merkataritza Hondakinen Udal Ordenantza berriari. EH Bildu eta Podemosen udal gobernuak aurkeztutako testua “hobetzeko” helburuarekin egin dutela adierazi dute, ohar bidez.
Ezker Anitza IUrentzat “ulertezina da araudi honek etxeetan eta merkataritza jardueretan hondakinen murrizketa bultzatzeko neurririk ez jasotzea”. Hondakinik onena sortzen ez dena dela erantsi dute, eta arlo horretan aurrera egiteko ekintzak planteatu behar direla uste dute.
“Ordenantza hau hondakinen bilketaren kudeaketan gelditzeaz gain, etorkizunean sortzeagatiko ordainketa eranstea planteatzeko pizgarri bakarrarekin, planteatzen dituen hobekuntza apurrak ez ditu amaitu ere egiten”, diote taldeko iturriek. Araudiak gainerakoen edukiontzia txartel adimendu batekin ixteari buruz hitz egiten duela nabarmendu dute, baina salatu dute ez dela egutegirik jasotzen erabiltzeko. “Argi izan beharko genuke, edukiontziekin biltzea aukeratuz gero, gainerakoen edukiontzia astean behin edo gehienez bitan ireki beharko litzatekeela, bereizitako bilketa-indize handiagoa bilatzen bada. Hala ere, hori ez da dokumentuan agertzen”.
Bilketa sistemei buruzko eztabaidarik ez planteatzearekin ere ez datozela bat esan dute, “kontuan hartuta Hondakinen Legeak hitzez hitz adierazten duela hondakinak kudeatzeko modurik egokiena atez atekoa dela. Legean bertan jasotako baieztapen hori PSOEk idatzi zuen, eta hark zein EAJk bozkatu zuten. Azken horiek hondakinak biltzeko sistema horren aurkako adalide bihurtu ziren, baina, gaur egun, Legearen testuan bertan onartzen dute egokiena dela; beraz, non dago horretaz hitz egiteko arazoa?”, galdetu diote udal gobernuari.
Taldeak aurkeztutako alegazioek “produktuak erosteko eta kontsumitzeko moduei buruz kontzientziazio lan handiagoa egitea” dute helburu, baina baita ere “kontsumitzaileengandik erabiltzaileengana pentsamoldea aldatzea eta tokiko merkatuak eta hurbileko produktuak bultatzea”.
Era berean, hondakinen aholku batzorde bat sortzea ere proposatu dute, “nahi duten bizilagunek, udalerriko elkartek, elkarteko gastronomikoek, eragile sozial eta politikoek eta gaian adituan diren pertsonek parte har dezaten, egunerokoan sortzen diren hondakinak murrizteko urratsak emateko”.
Aurkeztutako alegazioak udal gobernuak kontuan har ditzala espero du Ezker Anitza-IUk, “horiek guztiak hondakin gutxiago sortzera bideratuta daudelako eta atzean ingurune eta ingurumen osasuntsu bat uzteko datozenentzat”.
