Behar handiena zuen arratsa argitu dute
San Joan Bezperak nahiko grisa izan da, eta arratsaldeko suek eman zieten kolore pixka bat auzoei. Altzibarkoak, ikusgai.
San Joan Bezpera solstizioak dakarren uda ospatzeko eguna da, idatziek jasotzen ez duten garaietatik. Usadioa berritzeko arratsa izan zen atzokoa. Kazetaritzako topikoek “urteko gaurik motzena” erabiltzera eramaten dituzte kronikak sinatu behar dituztenak.
Atzokoan, baina, zeruaren gristasunak zailago jarri zuen eguna eta gaua bereiztea. Arratsean auzoetan piztutako suek koloreztatu zuten udaren—meteorologikoki ez behintzat— etorrera. Herriko hainbat auzo eta txokotan pilatutako egurrei su eman, eta gaua argitu zuten.
Horietako toki bat Altzibar auzoa izan zen. Datorren asteburuan ospatuko dituzte festak, bai, baina hasi dira haien aperitiboekin. Atzo Felisa, bidegorriko zaintzailea izenarekin ezagutzen den panpina erre zuten. Ostegunean botako dute suziria, eta ondoren pintxo-potearekin gozatuko dute.
