"Jaiak askatasunez eta errespetuz gozatzea ez da soilik desio bat, eskubide bat ere bada"
Sanpedroen atarian, eraso matxisten kontrako protokoloa aurkeztu du udalak. Berrikuntza gisa, aurten telefono bat izango da erabilgarri 24 orduz.
San Pedroko alkateordetzan egin dute kanpainaren aurkezpena. Pasaitarrak jaien zurrunbiloan sartuko dira datozen egun eta asteetan. San Pedroko Jaiak hasiko dituzte ostegunean, eta haien ondotik helduko dira gainerako barrutietako festak. Jaien atarian, erasoen kontrako protokoloa aurkeztu du udalak. San Pedroko alkateordetzaren kanpoaldean agerraldia eskaini dute udaleko ordezkari eta teknikariek, protokolo honen gaineko xehetasunak emateko.
Teo Alberro alkateak esan du udalean “argi” dutela, jaiak askatasunez eta errespetuz gozatzea ez dela “soilik desio bat, pertsona guztien eskubide bat” baizik. Hori bermatzeko, mugimendu feministarekin eta jaiak antolatzen aritu diren eragileekin elkarlanean aritu da udala, “indarkeria matxista prebenitzeko eta jai gune inklusibo, parekide eta askotarikoak sortzeko baldintzak bermatzeko”, esan du Laura Ré Berdintasun saileko zinegotziak.
Rék gaineratu duenez, Ez eraso sexistarik, ez eraso LGTBfoborik ez leloa jarri diote aurtengo kanpainari eta Izaro Mariezkurrena artista pasaitarrak diseinatutako jaietan libre zigilua sortu dute. Zigilu honekin “indarkeriarik gabeko jai parekideen aldeko konpromisoa adierazi” nahi dutela erantsi du.
Udalak dagoeneko protokoloa jasotzen duen dokumentu bat prest du, prebentzio eta arreta irizpide orokorrekin, eta lau jai batzordeek jaso dute. Horrez gai, hil honetan zehar tailer teoriko-praktiko bat egin dute udaleko langileek, “jaien testuinguruan gerta daitezkeen eraso matxistei erantzuna emateko gakoak ardatz hartuta”.
Berritasunak
Protokolo honen barruan, berrikuntza bat izango da aurten: 24 orduko arreta emango duen telefono zerbitzu bat, egun garrantzitsuenetan edo mugimendu handieneko egunetan erabilgarri izango dena. Zerbitzu honen eta gainerako baliabideen inguruko informazioa herriko etxe guztietan banatzen ari da udala, postontzietan banatzen ari dira, mezu instituzional batekin batera. 747 48 54 45 zenbakia jarri dute erabilgarri eta ondorengo egunetan ahalko da deitu: San Pedroko jaietan hilaren 28an eta 29an; Antxoko jaietan uztailaren 5etik 7ra; Trintxerpeko jaietan uztailaren 12tik 13ra eta Donibaneko jaietan uztailaren 24an, 27an eta 30ean.
