Udako kanten zerrenda proposatzeko azkeneko hamar egunak dira
Datorren asteko ostiralean itxiko da hamar kanten zerrenda aurkezteko epea. Parte-hartzaileen artean sariak zozkatuko dituzte.
Oiartzun Irratian zozkatuko dituzte sariak, uztailaren 12an. Urtero bezala, Oiartzungo gazteek udako abestien zerrenda aukeratu ahal izango dute. Udalak gogorarazi duenez, datorren ostiralean —uztailak 5— izango da bakoitzaren gustuko hamar abestien playlist-a aurkezteko eguna.
Euskarazko abestiak sustatzea da iniziatibaren helburua, eta aurtengoan ere bai, ohi bezala, euskarazko kantek lehentasuna izango dute. Aurkeztuko diren hamar abestietatik zortzik —gutxienez— euskaraz izan beharko dute.
10 eta 25 urte arteko gazteek parte har dezakete, eta horretarako galdetegi bat bete beharko dute.
Gazteek proposatutako abestiekin Oiartzungo Udako hamar kanta bozkatuenen zerrenda osatu eta ehunka kantekin playlist-a argitaratuko dute Spotify plataforman. Parte-hartzaileen artean bozgorailuak eta xanistebanetako barraketarako fitxak zozketatuko dituzte uztailaren 12an, epea itxi eta astebetera, Oiartzun Irratian.
Oiartzungo Udala eta Eskuttun (Haurtzaro) eta Ttirikittauki (Elizalde) ikastetxeetako euskara taldeak aritu dira elkarlanean.
