'El conquistador' saioa, sanpedrotar erara
EITBko saio famatuaren "ia erreplika" bat egingo dute gaur San Pedroko haur, gazte eta helduek. Piratakadarako prest dira taldeak, kapitainen zain dira.
Iazko Piratakadaren proba bateko irudi bat. Ez da Karibeko paradisuko hondartza bat, ezta Patagoniako ibai edo mendi ikusgarri bat, baina gaur El Conquistador del Fin del Mundo telebistako saioaren itxura hartuko du San Pedroko pilotalekuak. EITBko saio famatua oinarri hartuta, Piratakada izeneko proba sortan lehiatuko dira 11 urtetik gorako sanpedrotar asko. Taldeak prest dituzte dagoeneko, kapitainen zain dira. 16:30ean jakinaraziko diete taldeei nork gidatuko dituen gaurko probetan, orduan hasiko da ikurrina irabazteko lehia bizia.
Orain dela hiru urte abiatu zuen egitasmoa guraso talde batek. Nerea Enbilek hastapenak gogorarazi ditu: «Pandemia garaian, kalera ateratzen hasi ginenean, haur eta nerabe asko kalean ikusi genituen ikurrina batekin, El Conquis-eko probak egiten beraien kabuz. Lanean jarri ginen orduan guraso batzuk, oso gogotsu ikusi genituelako, eta haien aisialdian hutsune bat ikusi genuelako orduan».
EITBko saioaren «ia erreplika» bat da gaur ikusiko dena, «oso-oso antzekoa» izango dela dio sanpedrotarrak. Hiru urte hauetan telebistako saioan klasiko bilakatu diren proba asko errepikatuko dituzte gaur, kasu, labirintoaren proba ospetsua. «Telebistan egiten dituzten bezalaxe egingo ditugu probak. Labirintoa, sokak, yumar-ak… Denetik izango da urte honetan ere. Herrira ekarriko dugu berriro Conquis», zehaztu du Enbilek.
Telebistan bezala, taldetan lehiatuko dira partaideak, kolorez bereizitako hirutan. «Aurten Barbarin taldea erori egin da, baina haien ordez helduen talde bat ariko da. Karramarroak, Antxetak eta Begihaundiak lehiatuko dira. Aurreko edizioak ikusita heldu askok parte hartu nahi dutela jakinarazi digute». Handitzen eta errotzen jarraitzen du egitasmoak, beraz.
Asteartean aurkeztu zituzten taldeak. Haurrek aurkezpen bideo bat aurkeztu behar izan dute, eta aurkezpenean horiekin guztiekin osatutako bideo bat helarazi zieten sanpedrotarrei, motorrak berotzeko.
«Oso ikusgarria»
Enbilek aitortu du proba guztiak antolatzea lan mardula dela, baina «zalantzarik gabe», merezi duela dio: «Jendeak asko gozatzen du, giroa eta lehia ederrak dira». Gaurko probak ikustera gonbidatu ditu herritarrak, «gauza berezia eta potentea» izango delako Piratakada haren hitzetan. «Oso entretenigarria izango da, oso ikusgarria. Denek primeran pasako dute».
