"Erne eta tinko" egotera deitu udalak, "eskuratutako eskubideen alde"
LGTBIQ+ Harrotasunaren Eguna dela eta, adierazpen instituzionala adostu dute EH Bilduk eta EAJk. Ekintza plan integralak abiatzeko konpromisoa hartu dute.
LGTBIQ+ Harrotasun Eguna da gaurkoa, eta, horren harira, EH Bildu eta EAJren udal taldeek adierazpen instituzional bat adostu dute. “Gure bizitzez, gure genealogiaz eta LGTBIQ+ mugimenduaz harro” daudela adierazi dute.
“Estigmatizazio saiakerak” salatu dituzte, eta askapen mugimenduaren ibilbidea aldarrikatu dute, “Stonewalletik Euskal Herrira”. Eraso lgtbiqfobikoak “esponentzialki” hazten ari direla salatu dute, baita ikusezintasun saiakerak ere. Eskuratutako eskubideen aurrean jarrera irmoa adierazi dute bi udal taldeek idatzian: “Funtsezkoa da gizarte gisa erne eta tinko egotea eskuratutako eskubideen defentsaren alde”.
“Antolatzea eta borrokatzea” aldarrikatu dute, “armairurik gabe”. Instituzioek —euren kasuan— hainbat ekintza egin behar dituztela nabarmendu dute: “Politika publiko integral eta sendoak, perspektiba feministan oinarritutako zerbitzuak, babes kolektiborako eta autodefentsarako mekanismoak ezartzeko bideak…”.
Udalak konpromisoa hartu du Oiartzungo LGTBIQ+ pertsona direnen gaineko diagnosiak egin eta horren arabera plan integralak osatzekoa. LGTBIQ+ komunitateko kideekin egingo lituzkete plan horiek.
Beraien posizioa berretsi dute. “Azkenik, gogorarazi nahi dugu LGTBIQ+ eskubideen aldeko borroka guztion borroka dela. Ezin dugu onartu gorrotoa eta intolerantzia nagusitzea. Gaur, inoiz baino gehiago, gure aniztasunean bat egin behar dugu, pertsona guztiok duintasunez, errespetuz eta askatasunez bizi ahal izango garen etorkizun bat eraikitzeko”.
Gaurko mobilizazioetan parte hartzera gonbidatu dituzte oiartzuarrak, halaber.
