Sanferminetarako bi aparkaleku berri egokituko ditu udalak
Estreinakoz, Don Boscon eta Usozeko eremuan aparkatzeko gune bana egokituko dituzte festek iraun bitartean.
Sanferminak heltzear dira, egun oso gutxi geratzen dira festak eztanda egiteko Antxon. Festen harira antolatutako ekitaldiek aparkalekuetan eragina izango dutela iragarri du udalak. Aurten, estreinakoz, Don Boscon eta Usozeko eremuan aparkatzeko gune bana egokituko dituzte.
Usozeko kirol eremuan (Pasaia- Lezo Lizeoa ikastetxearen kanpoaldean) eta Don Bosco LHII zentroan zabalduko dituzte aparkaleku ezohiko horiek. Usozekoa osteguneko (hilak 4) 22:00etatik aurrera izango da erabilgarri, hilaren 9ra (asteartea da) arte, mugarik gabe.
Don Boscoko aparkalekuari dagokionez, bihar (hilak 1) 8:00etatik izango da erabilgarri, hilaren 10eko (asteazkena da) 21:00ak arte. Denbora tarte horretan egunean zehar libreki aparkatu ahalko da bertan. 120 plaza baino gehiago eskainiko dituzte zentroak eskuragarri jarriko dituen bi aparkalekuetan. 8:00etatik 22:30era utzi ahalko da autoa bertan eta bertako hesia gauez itxiko dutela jakinarazi du udalak. Hortaz, autoak ezin izango dira gauez sartu edo atera, baina ahalko dira bertan utzi gau osoan.
Bi hauez gain, Luzuriagako eremuan barrakek okupatuko ez duten eremuan bertakoentzako aparkaleku bat egokituko du udalak. Feria honen muntaketagatik, ezingo da Luzuriagako aparkalekuan balizatutako guneetan aparkatu, biharko (hilak 2) 8:00etatik hilaren 10era (asteazkena da) arte. Kupeldegi eta Blas de Lezo arteko Hamarretxeta kalean ere ezingo da aparkatu, postuak jarriko dituztelako bertan. Ostegunetik (hilak 4) asteartera arte (hilak 10) ezingo da kale horretan autorik aparkatu.
Bestalde, bihartik hilaren 9ra bitarte Hamarretxeta, Zumalakarregi, Oarso eta Gure Zumardia zirkulaziorako itxiko dituzte.
Herrirako sarbideak betikoak izango dira, Eskalantegi eta Oarsoko zubitik hain zuzen. Dena den, “trafiko perimetrala” ezarriko dutela jakinarazi du udalak, honako kale hauetatik: Eskalantegi, Luzuriagako aparkalekuaren perimetrala, Gelasio Aranburu, Blas de Lezo eta Maiatzarenb Lehena.
Antxotik ateratzeko, berriz, ondorengoak izango dira bideak: Papingo bidea, Luzuriaga-Gelasio Aranburu-Oarsoko biribilgunea edo Blas de Lezo.
Udaltzaingoak balizatutako guneetan ezin dela aparkatu gogorarazi du eta bertan autoa uzten dutenei isuna ezarriko dietela ohartarazi diete, eta garabiarekin autoak erretiratuko dituztela. Informazio gehiago jaso nahi dutenek 943 00 43 00 telefono zenbakira hots egin dezakete.
