Herriko beterano eta gazteen arteko 'desafiyua', Oiartzun Irratiaren festan
Oiartzun Irratiak 25. urtemuga ospatuko du hilaren 13an. Herri kirolen desafioa egingo dute egun horretan. Apustu egin daiteke batzuen ala besteen alde.
Oiartzun Irratiak 25 urte beteko ditu San Fermin Egunean. Lehenengo emisio horren mende laurdena ospatzeko, festa eguna antolatu dute hilaren 13rako. Egun horretarako ekitaldi sorta polita antolatu dute, tartean herri bazkari bat. Txartelak salgai daude irratian bertan edo eraikin bereko —Landetxeko— tabernan.
Hala ere, ikusmin handiena sor dezakeen ekitaldia herriko gazteen eta beteranoen arteko desafiyua izango da. 12:00etan izango da, Done Eztebe plazan. Herri kiroletako bost probetan arituko dira, nor baino nor, herriko gazte eta beteranoak. Honakoak izango dira probak eta horien alineazioak:
- Trontza
- Beteranoak: Amalur Arbelaitz Arbelaitz Ozentziyo eta Karmele Irastorza Lekuona Otsua.
- Gazteak: Maddi eta Ekhiñe Soroa Valenciano.
- Zakua
- Beteranoak: Xabier Irazoki Irastorza.
- Gazteak: Xuban Arozena Aduriz.
- Lokotxa
- Beteranoak: Felipe Mitxelena Erice.
- Gazteak: Mikel Aranburu Mitxelena.
- Karretila
- Beteranoak: Alazne Mutiloa Irazusta eta Juan Krutz Zabaleta Iraola Beltza.
- Gazteak: Aitor Jauregi Irazusta eta Iker Sein Lasa.
- Aizkora
- Beteranoak: Joxe Arbelaitz Mendiburu Ttakalo.
- Gazteak: Jon Bengoetxea Izagirre.
Apustua, Hitzan
Oiartzun Irratiak Oarso Bidasoarekin elkarlanean daramatza hainbat urte. Horren isla da astelehen eguerdietan eskualdeko albisteei ematen zaion errepasoa.
Oarso Bidasoko Hitzak desafiyua-ren porra antolatu du. Aste honetan jarriko da, eta hemen izango da parte hartzeko aukera. Edonork parte har dezake, eta beteranoen ala gazteen alde egin beharko da.
Saria Oiartzun Irratiaren produktu-sorta bat izango da: kamiseta, poltsa eta katilua. Asmatzen dutenen artean zozkatuko da.
