'Troia' kaleko antzerkia, denboraldiari ginga jartzeko
Kamikaz kolektiboaren antzezlana ikusteko aukera izango da Landetxe plazan, ostiral arratsaldean. Sasoiko azkeneko emanaldia izango da.
Gaztañaga, Elias eta Olaizola. Oiartzungo Antzerkizaleen Elkarteak antolatutako teatro programazioa, duela urte batzuetatik, kaleko antzerkiarekin bukatu ohi da. Ekaina herriko antzerki taldeentzako izan ohi da, eta uda giroa aprobetxatuta, kalera ateratzen dute antzerkia.
Aurtengoan Kamikaz kolektiboa gonbidatu dute. Urola Kostako hiru emakume aktorek osatutako taldearen Troia antzezlana Landetxera eramango dute. Oraingoan ez da auditorioan izango, plazan baizik.
Ostiral arratsaldean izango da antzezlana, herrian asteko giro politena sortzen den momentuan. 19:00etan hasiko dira Amancay Gaztañaga, Erika Olaizola eta Iraia Elias aktoreak —eta obraren sortzaileak— antzezpenarekin. Kalean izanda, doan izango da. Programazioa itxiko dute, modu horretan.
Sinopsia
Herrian objektu misteriotsu bat agertu da. Arriskutsua izan daitekeelakoan hiru superheroi hauek deitu dituzte herria salbatzeko. Beraien botere guztiak erabiliko dituzte misioa aurrera eramateko eta herritarren laguntza ezinbestekoa da. Herrian sortu den tentsioa handia da eta edozein momentutan eztanda egin dezake.
Fitxa teknikoa
- Zuzendaritza: Espe Lopez, Iraia Elias, Amancay Gaztañaga eta Erika Olaizola.
- Aktoreak: Erika Olaizola, Iraia Elias eta Amancay Gaztañaga.
- Testua: Amancay Gaztañaga, Erika Olaizola eta Iraia Elias.
- Soinu Banda: Alejo Orbegozo.
- Narratzailea: Jesus Eguzkitza.
- Teknika: Imanol Garcia eta Javier Martinez Mono.
- Diseinua eta argazkiak: Alain Martinez (Holy Fire).
- Jantziak: Kamikaz Kolektiboa.
- Makillajea: Xanti Agirrezabala.
