Albaolako bi ordezkari Atlantic Challenge Internationalen ariko dira
Ane Antxustegietxarte eta Eider Arruti Greens Islandera joango dira Euskal Herria lehiaketan ordezkatzeko asmoz.
Ane Antxustegietxarte eta Eider Arrutik Greens Islad-era (Estatu Batuak) bidaiatuko dute nazioarteko eskifaiarekin bat egin eta elkarrekin bi astez entrenatzeko.
Prestaketa prozesua burutzen dutenean, berriz, Belfast herrira joango dira, Maine estatuaren iparraldera alegia, Atlantic Challenge International-en Danimarka, Kanada eta Irlanda bezalako taldeen aurka lehiatzeko.
Aurtengo edizioa uztailaren 20tik 29ra egingo da, eta Albaola Itsas Kultur Faktoriak aukeratutako bi emakumeek Euskal Herriaren ordezkari gisa hartuko dute parte. Lehiaketa honek hainbat proba biltzen ditu; hala nola bela nabigazioa, arraun estropadak eta itsas korapiloak.
Albaolakoek adierazi dute haien ordezkariak arduratuko direla gure itsas ondare kultural eta aberatsaren hedapenari jarraipena emateaz, bai eta beste kostalde batzuetako pertsona “interesdunekin” loturak ezartzeaz eta ideien trukea sustatzeaz ere.
1984an sortua
Atlantic Challenge International nazioarteko hezkuntza ekimen bat da, eta mundu osoko gazteek hartzen dute parte. Gainera, bela eta arraun nabigazio tradizionalaren testuinguruan, ekimen honen sortzaileek gazteengan gure gizartean beharrekoak diren balio positiboak piztea suspertzea bilatzen du: talde lana, berdintasuna, aniztasuna…
Talde guztiek ‘Bantry’ yola bat erabiltzen dute, hamabi metroko luzera duen XVIII. mendeko ontzi bat. Lehiatzeko, talde bakoitzak bere yola eraiki behar du eta bide batez, tripulazio bat osatu.
