Berritasunez beterik dator aurtengo Karmengo Jaietako 5K lasterketa
Helduen lasterketan 200dik gora lagunek izena eman dute jada. Trikaia atletismo taldeak jauzi bat eman nahi izan du aurten, ez da lasterketa bakarra izango.
Iazko lasterketaren irudi bat. Trintxerpeko Trikaia atletismo taldea Karmengo Jaiei begira dago jada. Hurrengo asteburuan helduko da taldearen ekitaldi edo festa handia: 5 kilometroko lasterketa egingo dute hilaren 14an (igandea da).
2022an lehen lasterketa antolatu zutenetik, etengabe goraka joan da jaietako lasterketa, errotutako ekitaldia bilakatu da jada jaietan. Aurten, momentuz, 200dik gora lagunek izena eman dute, iazko langa erraz gainditu dute. Oraindik zalantzarik dutenek edo ohartu ez direnek hilaren 13ra (larunbata da) bitarte eman dezakete izena, 14:00ak arte hain zuzen.
Lasterketa txiki bat izateko, lasterketa handi eta profesional baten antzera, askotariko zerbitzuak eskainiko dizkiete lasterkariei: korrikalariaren poltsa bat, txapela bat, masaje bat emateko aukera, pintxo bat doan Bustiara tabernan eta lasterkari guztientzako 3D inpresio bidez egindako dominak. Zozketak ere izango direla aurreratu dute.
Podiuma osatuko dutenez gain, helmugara iristen diren lehen hiru pasaitarrek ere sari berezia jasoko dute. 9:25ean hasiko da lasterketa.
Berritasunak
Hirugarren edizio honetarako jauzi bat eman nahi izan dute Trikaia taldekoek, berritasunez beterik dator aurtengoa. Hauen artean, haurren lasterketa egingo dutela aurreratu dute, eta hasi aurretik ja, arrakasta izaten ari dela. Izan ere, 100dik gora haurrek izena eman dute dagoeneko. Lehena edo azkena helduta ere, denek jasoko dute domina bat. 10:30ean izango da haurren lasterketa.
Aurten ere estreinakoz, aniztasun funtzionala duten pertsonei begirako lasterketa bat egingo dute, emakumezko zein gizonezkoena. Handbike modalitatean ere parte hartu ahalko da. Kemen Kirol Klubarekin elkarlanean aritu dira hau antolatzeko.
Kutsu solidarioa ere izango du aurtengoak, garun paralisia duen Markel Merino lezoarra laguntzeko probestu nahi baitute aurtengoa. Markelen Irriak elkartearekin batera aritu dira antolatzaileak, eta elkarlanen honen harira, dortsal bakoitzeko euro bat emango diote elkarteari. Lasterketak iraun bitartean Markelen Irriak elkarteko kamisetak, jertseak eta zozketak izango dira. Arkaitz Erize Kaluk ere ez du hitzordu handia galduko. Kilometro batzuk egingo ditu Markel aulkian eramaten.
Izena emateko helduek 10 euro ordaindu beharko dituzte aurretik egiten badute, eta bestela, egunean bertan 15 euro. Haurren dortsalak doakoak izango dira. Helduen izen emateak lotura honetan egin daitezke eta haurrenak, berriz, hemen.
