Hondakinen ordenantza berria "onuragarria" izango dela uste du EAJk
Astearteko osoko bilkuran onartutako etxeko eta merkataritzako hondakinen udal ordenantzaz aritu dira jeltzaleak. Udal gobernuak "herritarrak sentsibilizatzearen alde egin" izana txalotu dute, "eredu bat inposatu beharrean".
Joan den astearteko osoko bilkuran Pasaiako etxeko eta merkataritzako hondakinen udal ordenantza berriari hasierako onarpena eman zioten, tartean, EAJ taldearen aldeko botoekin. Onarpen honen harira, jeltzaleek “gure bizilagunen eguneroko bizitzan eragiten duen gai garrantzitsu baten inguruan” duten jarrera argitu nahi izan dute.
Apirilaren 8ko 7/2002 Legera jo dute jeltzaleek, ekonomia zirkular baterako hondakinei eta lurzoru kutsatuei buruzkoa. Lege honek, besteak beste, “zuzenean eragiten diguten bi gai garrantzitsu” ezartzen dituela esan du EAJko bozeramaile Loreto Osak. “Alde batetik, ezartzen du nahitaezkoa dela sortutako hondakin kopuruaren arabera ordaintzea, hau da, zenbat eta hondakin gehiago sortu, orduan eta gehiago ordaindu beharko da. Aldi berean, merkataritzako eta etxeko hondakinak behar bezala kudeatzeko plan bat egitea eskatzen du”, esan du. Gainera, lege honek, materialak bereizteari eta birziklatzeari buruz “helburu oso handinahiak” ezartzen dituela erantsi du Osak. “Horrek guztiak Legearen eskakizunetara egokitzeko neurriak hartzera behartzen gaitu”, erantsi du.
Aurreko legegintzaldiaren (EAJ gobernu horren parte zen, PSE-EE buru) bukaeran Pasaia lege berrira egokitzeko “hainbat ekimen” abian jarri zituztela erantsi du bozeramaileak. Orduan, egoeraren azterketa bat kontratatu zutela gogorarazi du, “hondakinen kudeaketa egokiari buruzko sentsibilizazio eta kontzientziazio kanpainak ezartzeko”. Hala, hondakinak kudeatzeko plana prestatzen hasi ziren jeltzaleak, “indarrean dagoen araudira egokitzeko” asmoz.
Osak erantsi du udal gobernuak proposatu berri duen ordenantzak Lazkao, Beasain eta Urnietan erabiltzen diren edukiontzien eredua hartzen duela erreferentziatzat. Udalerri horietan txartel elektroniko bidez irekita dauden edukiontziak erabiltzen dituzte, eta jeltzaleek diote “emaitza oso onak” lortu dituztela hondakinen bereizketan. Jeltzaleen ustez, hori da jarraitu beharreko eredua, “Pasaiako EAJk beti defendatu duen eredua, batzuk atez atekoa inposatzen saiatzen zirenean ere”.
“Dirudienez, Gipuzkoako hondakinen kudeaketaren ziklo osoa itxi ondoren, EH Bildu konturatu da hondakinak edukiontzietan utziz behar bezala kudeatzearen alde egin behar dela, eta erabaki du herritarrak sentsibilizatzearen alde egitea, eredu bat inposatu beharrean, eredu hori ezartzeak bizilagunen artean zatiketa sortzen baitzuen”, nabarmendu du bozeramaileak.
Ordenantza hau, “Pasaiarentzat eta pasaitarrentzat onuragarria” izango dela uste dute, hori bai, “sentsibilizazio kanpaina egoki batekin eta herritarrak etapa berrira egokitzeko beharrezko epearekin batera” egiten bada. Horregatik egin dute ordenantza horren alde.
